मराठवाड्यात अजून २ दिवस पाऊस !

१३ जानेवारी नंतर थंडीत वाढ होण्याची शक्यता !

नाशिक – पश्चिमी चक्रवातामुळे उत्तरेत वाढलेली थंडी, ईशान्येकडील आर्द्रतायुक्त वारे आणि दक्षिणेकडून वहाणार्‍या वार्‍यांच्या संयोगातून महाराष्ट्रासह दक्षिणेकडील राज्यात ढगाळ वातावरण निर्माण झाले आहे. मराठवाडा, कोकण, पश्चिम महाराष्ट्र आणि उत्तर महाराष्ट्रात काही ठिकाणी २ दिवस पावसाचा अंदाज आहे. १३ जानेवारीनंतर थंडीत वाढ होण्याची शक्यता नागपूर वेधशाळेने वर्तवली आहे. मराठवाडा, कान्हादेश, पश्चिम महाराष्ट्रासह कोकणात ९ आणि १० जानेवारी या दिवशी दिवसभर ढगाळ वातावरण होते. काही भागात तुरळक पाऊसही पडला. सायंकाळनंतर वारे वहात असल्याने गारवा जाणवत होता.