बिबट्याच्या आक्रमणात राजापूर (जि. रत्नागिरी) येथील नायब तहसीलदार दीपाली पंडीत घायाळ

राजापूर –  येथील नायब तहसीलदार दीपाली पंडीत या २८ फेब्रुवारीला रात्री १०.३० वाजण्याच्या सुमारास शहरातील भटाळी येथे बिबट्याने केलेल्या आक्रमणात घायाळ झाल्या आहेत. पंडीत या राजापूर पंचायत समितीच्या वार्षिक स्नेहसंमेलनाच्या कार्यक्रमाला आपल्या दुचाकीवरून निघाल्या होत्या. त्या राजापूर पोलीस लाइनपासून काही मीटर अंतरावर आल्या असता तेथे दबा धरून बसलेल्या बिबट्याने अचानक त्यांच्यावर आक्रमण केले.

बिबट्या आक्रमण करत असल्याचे त्यांच्या लक्षात येताच त्यांनी दुचाकी पळवण्याचा प्रयत्न केला; मात्र बिबट्याने त्यांचा पाठलाग केला. बिबट्याने त्यांच्या हातावर पंजा मारला असून दुचाकीवरून पडल्याने त्यांच्या डोक्याला दुखापत झाली आहे. या वेळी याच रस्त्याने येणार्‍या काही पोलिसांच्या ही घटना निदर्शनास आल्यावर त्यांनी दीपाली पंडीत यांना राजापूर ग्रामीण रुग्णालयात उपचारांसाठी भरती केले आहे.