कराड येथे २ धर्मांधांकडून नागरिकांना मारहाण करत दहशत माजवण्याचा प्रयत्न !

कराड, २२ जुलै (वार्ता.) – येथील बैल बाजारा रस्त्यावर मोरया वसाहत परिसरात २ धर्मांधांनी केशकर्तनालय (सलून) व्यावसायिकास विनाकारण मारहाण केली. परिसरात रस्त्यावरून शिवीगाळ करत इतर व्यावसायिकांना दुकाने बंद करण्यास भाग पाडले. तसेच रस्त्यावर उभ्या असलेल्या रिक्शाच्या काचा फोडून दहशत माजवण्याचा प्रयत्न केला.

या प्रकरणी कराड शहर पोलीस ठाण्यात केशकर्तनालयाचे मालक संतोष राऊत यांनी तक्रार केली आहे. तक्रारीत म्हटले आहे की, साहिल आतार आणि पप्पू पठाण यांनी दुकानात येऊन मोठमोठ्याने शिवीगाळ करत लाथाबुक्क्यांनी मला मारहाण करण्यास प्रारंभ केला. तसेच ‘आम्ही मलकापूरचे भाई आहोत. मलकापुरात रहायचे असेल, तर आम्ही म्हणतो तसेच तुम्ही वागले पाहिजे’, असे म्हणत मोठमोठ्याने शिवीगाळ केली.

या धर्मांधांनी इतरांनाही फायटरने (हाताच्या बोटात अडकवून वापरण्याचे शस्त्र) मारहाण केली असून काही जणांना रुग्णालयात जाऊन उपचार घ्यावे लागले आहेत. या घटनेनंतर उपविभागीय पोलीस अधिकारी डॉ. रणजित पाटील यांनी घटनास्थळी भेट दिली असून आतार आणि पठाण यांना कह्यात घेण्यात आले आहे.