कमलेश तिवारी यांच्या मारेकर्‍यांना तात्काळ फाशी द्या, अन्यथा मी आत्मदहन करीन !

लक्ष्मणपुरी (उत्तरप्रदेश) – येथे १८ ऑक्टोबर २०१९ या दिवशी हिंदुत्वनिष्ठ नेते कमलेश तिवारी यांची मुसलमानांनी नृशंस हत्या केली होती. उदयपूर हत्याकांडानंतर आता तिवारी यांच्या पत्नी किरण तिवारी यांनी त्यांच्या पतीच्या मारेकर्‍यांना तात्काळ फाशीची शिक्षा देण्याची मागणी केली आहे. ‘तसे केले नाही, तर आत्मदहन करीन’, अशी चेतावणीही त्यांनी उत्तरप्रदेश सरकारला दिली आहे.

उत्तरप्रदेश सरकारवर ओढले ताशेरे !

एका वृत्तवाहिनीला दिलेल्या मुलाखतीत किरण तिवारी म्हणाल्या की,

१. माझ्या पतीच्या हत्येला ३ वर्षे होऊनही मुख्य सूत्रधार तन्वीर अजूनही पकडला गेलेला नाही. दुसरीकडे १३ पैकी ५ आरोपींना जामीन मिळाला असून त्यांच्यापासून आमच्या जीविताला धोका आहे. आम्ही भयाच्या सावटाखाली जगत आहोत.

२. सरकार ‘आमची हत्या व्हावी’, या प्रतीक्षेत आहे  का? जेणेकरून त्यांना राजकारण करता येईल ?

३. आम्हाला एक सुरक्षारक्षक देण्यात आला आहे. जर आमच्यावर कुणी आक्रमण करायला आले, तर तो आमचे रक्षण करील कि स्वत:चे ?

४. माझे पती श्रीराममंदिराचे पक्षकार होते. ते १५ वेळा कारागृहात जाऊन आले आहेत. त्यांनी अनेक वेळा पोलिसांचा लाठीमार झेलला आहे. त्यांच्या विरोधात राष्ट्रीय सुरक्षा कायद्यांतर्गत न्यायालयीन खटला चालला. त्या वेळीही ते ११ मास कारागृहात होते. हिंदूंसाठी लढणार्‍या माझ्या पतीसाठी अधिवक्ता (पू.) हरि शंकर जैन यांनी न्यायालयीन प्रकरण लढले होते.

रोहिंग्या मुसलमानांपासून आमच्या जीविताला धोका !

किरण तिवारी पुढे म्हणाल्या की, गरीबी रेषेच्या खाली असलेल्या लोकांसाठी जसा असतो, तसा सरकारी निवास आम्हाला मिळाला आहे. त्या ठिकाणी चारही बाजूंना रोहिंग्या मुसलमान रहात आहेत. आम्ही त्या घरात पाऊलही ठेवलेले नाही. मी माझ्या मुलांसह रस्त्यावरही राहिले, तरीही आमचे रक्षण होऊ शकेल. आम्ही सरकारी निवासात रहायला गेलो, तर आमची निश्‍चितपणे हत्या होईल.