मृत्यूनंतर माझा दफनविधी औरंगाबाद येथे करा ! – असदुद्दीन ओवैसी, खासदार, एम्.आय.एम्.

ओवैसी यांचे खरे दात समोर आले ! – शिवसेनेची टीका

संभाजीनगर – ‘मृत्यूनंतर माझा दफनविधी संभाजीनगर येथे करा,’ असा पुनरुच्चार एम्.आय.एम्. पक्षाचे प्रमुख आणि खासदार असदुद्दीन ओवैसी यांनी नुकताच येथे केला आहे. मुसलमान पंथात जिल्ह्यातील खुलताबाद हे शहर पवित्र मानले जाते. त्यामुळे मोगल सम्राट औरंगजेबाची कबर खुलताबाद येथेच आहे. याच संदर्भातून ओवैसी यांनी हे विधान केले. यावर शिवसेनेचे आमदार अंबादास दानवे म्हणाले, ‘‘ओवैसी हे स्वत:ला औरंगजेब समजतात. ज्याप्रमाणे औरंगजेबाची कारकीर्द धर्मांध होती, त्याचप्रमाणे ‘एम्.आय.एम्.’चे काम आहे. ओवैसी यांचे खरे दात समोर आले आहेत’’, अशी टीका त्यांनी केली.

‘एम्.आय.एम्.’चे प्रदेशाध्यक्ष खासदार सय्यद इम्तियाज जलील शिवसेनेला प्रत्युत्तर देतांना म्हणाले की, दानवे यांच्या बडबडीकडे मी लक्ष देत नाही. आमचे पक्षाध्यक्ष ओवैसी प्रथमच असे म्हणाले नाहीत, यापूर्वीही त्यांनी भाग्यनगर आणि इतर ठिकाणी झालेल्या भाषणांमध्ये असे घोषित विधान केले होते.