कॉ. पानसरे हत्या प्रकरणात अटक केलेले संशयित गणेश मिस्कीन यांना ‘वेरिकोज व्हेन’साठी उपचार मिळावेत ! – जिल्हा आणि सत्र न्यायाधीश यांच्याकडे आवेदन

कोल्हापूर, २४ ऑगस्ट (वार्ता.) – कॉ. गोविंद पानसरे हत्या प्रकरणात कोल्हापूर पोलिसांनी अटक केलेले संशयित गणेश मिस्कीन हे सध्या भायखळा येथील ‘सेंट्रल जेल’ (ऑर्थर रोड कारागृह) येथे असून त्यांना डाव्या पायात ‘वेरिकोज व्हेन’मुळे प्रचंड त्रास होत आहे. ‘वेरिकोज व्हेन’साठी विशेष उपचारांची आवश्यकता असते. त्यासाठी पुढील उपचारांसाठी मुंबई येथील जे.जे. रुग्णालयात भरती होणे आवश्यक असतांना मिस्कीन यांना वारंवार कारागृहातील वैद्यकीय अधिकार्‍यांकडेच उपचारांसाठी पाठवण्यात येत आहे. तरी गणेश मिस्कीन यांनी ‘वेरिकोज व्हेन’साठी जे.जे. रुग्णालयात पुढील उपचार मिळावेत, असे आदेश न्यायालयाने द्यावेत, असे आवेदन गणेश मिस्कीन यांच्या वतीने अधिवक्ता समीर पटवर्धन यांनी जिल्हा आणि सत्र न्यायाधीश बी.डी. शेळके यांच्याकडे २४ ऑगस्ट या दिवशी सादर केले आहे. यावर पुढील सुनावणी २७ ऑगस्टला होणार आहे.