Vistara_Airlines : विस्तारा एअरलाईन्सला ग्राहक आयोगाकडून १ लाख रुपयांचा दंड

नवी देहली – एका न्यायाधिशांनी तिकीट आरक्षित करूनही ‘विस्तारा एअरलाईन्स’ने त्यांना विमानात चढू न दिल्याच्या कारणावरून ग्राहक आयोगाने या एअरलाईन्सला १ लाख रुपयांचा दंड आणि कायदेशीर खर्चापोटी १० सहस्र रुपये देण्याचा आदेश दिला. तक्रारदार न्यायाधिशांचे नाव भूपेंद्र कुमार वासनीकर आहे. ते छत्तीसगडमधील जिल्हा न्यायालयात अतिरिक्त जिल्हा न्यायाधीश म्हणून कार्यरत आहेत.

वर्ष २०२३ मध्ये काश्मीरहून परततांना न्यायाधिशांच्या कुटुंबाने देहलीहून रायपूरला (छत्तीसगड) जाण्यासाठी ‘विस्तारा एअरलाईन्स’चे तिकीट आरक्षित केले होते; मात्र विमान उड्डाण होण्याआधी विमानातील जागा भरल्यामुळे न्यायाधिशांना विमानात बसण्यास मनाई करण्यात आली. आरक्षित तिकीट असूनही एअरलाईन्सने अपमानास्पदरित्या विमानात न घेतल्यामुळे संबंधित न्यायाधिशांनी ग्राहक आयोगाकडे धाव घेतली होती. एअरलाईन्सने त्यांचे ७ सहस्र रुपयांचे तिकीट परस्पर दुसर्‍या प्रवाशाला ४० सहस्र रुपयांना विकल्याचे उघड झाले होते.

अशाच प्रकारच्या तक्रारी असलेल्या ग्राहकांनी साहाय्यासाठी आपापल्या राज्यातील ‘ग्राहक हेल्पलाइन’वर संपर्क साधावा किंवा राष्ट्र्रीय ग्राहक हेल्पलाइन १९१५ वर संपर्क करावा, असे आवाहन ग्राहक आयोगाकडून करण्यात आले आहे.