पाकमध्ये धर्मांधांकडून गणपति मंदिराची तोडफोड !

श्री गणेश, शिव आणि पार्वती यांच्या मूर्तींची तोडफोड

पाकमधील हिंदू आणि त्यांची मंदिरे असुरक्षित आहेत, हे काही नवीन राहिलेले नाही; मात्र त्यांच्या रक्षणासाठी भारतातील ८५ कोटी हिंदु आणि त्यांचे सरकार, तसेच जगभरातील हिंदू धोरणात्मक कृती करत नाहीत, हे लक्षात घ्या !

इस्लामी देशांमध्ये हिंदूंची ही स्थिती भारतातील निधर्मीवाद्यांना का दिसत नाही ? ते याविषयी कधीच का बोलत नाहीत ?

पाकच नव्हे, तर जगभरातील हिंदूंचे आणि त्यांच्या धर्मस्थळांचे रक्षण करण्यासाठी भारतात हिंदु राष्ट्र स्थापन करण्याला पर्याय नाही !

वरील चित्र प्रसिद्ध करण्यामागे कुणाच्याही धार्मिक भावना दुखावण्याचा हेतू नाही. माहितीसाठी हे चित्र प्रसिद्ध केले आहे. – संपादक

इस्लामाबाद (पाकिस्तान) – पाकच्या पंजाब प्रांतातील भोंग शहरामध्ये धर्मांधांनी गणपति मंदिराची तोडफोड केली. मंदिरातील श्री गणेश, शिव आणि पार्वती यांच्या मूर्ती, तसेच झुंबर अन् सजावटीचे काचेचे साहित्य या धर्मांधांकडून फोडण्यात आले. या घटनेचा व्हिडिओ सामाजिक माध्यमातून प्रसारित झाला आहे. यात मोठ्या संख्येने धर्मांध दिसून येत आहेत. या घटनेच्या प्रकरणी अद्याप कुणावरही कारवाई करण्यात आलेली नाही; मात्र मंदिराजवळ पोलीस बंदोबस्त ठेवण्यात आला आहे. पाकच्या पंतप्रधान कार्यालयाने या घटनेची नोंद घेतली असून मंदिरातील तोडफोड प्रकरणी दोषींवर कारवाई करण्याचा आदेश देण्यात आला आहे. येथील उपायुक्त डॉ. खुरम शहजाद यांनी मंदिराला भेट देऊन निरीक्षण केले.

पोलिसांकडून दुर्लक्ष !

स्थानिक हिंदूंनी पोलिसांकडे याविषयी तक्रार करण्याचा प्रय्तन केला असता त्यांनी त्याकडे दुर्लक्ष केले. यामुळे हिंदूंनी थेट सर्वोच्च न्यायालयाच्या सरन्यायाधिशांकडे आरोपींवर कारवाई करण्याची मागणी केली, अशी माहिती पाकमधील हिंदु परिषदेचे अध्यक्ष डॉ. रमेश वंकावणी यांनी दिली.