३ अपत्यांमुळे सोलापूर येथील शिवसेना नगरसेविकेचे पद रहित

मुंबई उच्च न्यायालयाचा निकाल

सोलापूर – येथील महानगरपालिकेतील प्रभाग क्रमांक ११ च्या शिवसेनेच्या नगरसेविका अनिता मगर यांचे पद उच्च न्यायालयाने रहित केले आहे. मगर यांना ३ अपत्ये असून तिसरे अपत्य हे १२ सप्टेंबर २००१ नंतरचे असल्याचे कारण देत उच्च न्यायलयाने हा निकाल दिला आहे. भाजपच्या भाग्यलक्ष्मी म्हंता यांनी यासंदर्भात याचिका प्रविष्ट केली होती, अशी माहिती मुंबई उच्च न्यायलयातील अधिवक्ता अजित आळंगे यांनी दिली.

वर्ष २०१७ मध्ये झालेल्या सोलापूर महानगरपालिकेच्या सर्वसाधारण निवडणुकांमध्ये भाजपच्या भाग्यलक्ष्मी म्हंता यांचा पराभव करून शिवसेनेच्या अनिता मगर निवडून आल्या होत्या; मात्र मगर यांना ३ अपत्ये असल्यामुळे त्यांचे नगरसेवक पद रहित करण्याची मागणी म्हंता यांनी न्यायालयाकडे केली होती. यासंदर्भात सोलापूर न्यायालयाने म्हंता यांच्या बाजूने निकाल देत मगर यांचे पद रहित केले होते. त्यानंतर अनिता मगर यांनी या निकालाविरोधात मुंबई उच्च न्यायालयात रीट याचिका प्रविष्ट केली होती; मात्र म्हंता यांच्या अधिवक्त्यांनी न्यायालयात सादर केलेले पुरावे आणि युक्तीवाद ग्राह्य धरत उच्च न्यायालयाने सोलापूर न्यायालयाचा निकाल कायम ठेवला असून अनिता मगर यांची याचिका फेटाळली आहे.