पुणे येथे पोलिसांचा गणवेश घालणार्‍या बनावट मुसलमान महिलेला अटक !

पुणे – पोलिसांचा गणवेश परिधान करून तोतया पोलीस उपनिरीक्षक असल्याची बतावणी करणार्‍या समिना आफिस इनामदार उपाख्य समिना आयुब पठाण या २५ वर्षीय मुसलमान महिलेला लष्कर पोलिसांनी अटक केली. एका खासगी रुग्णालयातील आधुनिक वैद्याची भेट लवकर व्हावी म्हणून बनावट पोलीस बनून ती आली होती, असे उघड झाले. आरोपी महिला ६ जून या दिवशी ‘व्हिक्टरी चित्रपटगृहा’समोरील एका खासगी रुग्णालयात आली होती. त्याच वेळी साहाय्यक फौजदार शिंदे हे वैद्यकीय पडताळणीसाठी गेले होते. शिंदे यांना पाहिल्यानंतर आरोपीने त्यांच्याकडे कोणत्या पोलीस ठाण्यात आहात ? अशी विचारणा केली.

शिंदे यांना आरोपीने घातलेल्या गणवेशावर ‘नेमलेप्ट’ (नावाची पाटी) चुकीची असल्याने संशय आला. त्यांनी आरोपीकडे विचारणा केली आणि सदर घटना लष्कर पोलीस ठाण्यातील महिला पोलीस कर्मचार्‍यांना सांगितली. त्यांनी येऊन आरोपीकडे चौकशी केली असता बनाव उघड झाला.