खाट उपलब्ध न झाल्याने कोरोनाबाधित रुग्णाचा मृत्यू

रांची (झारखंड) येथे राज्याचे आरोग्यमंत्री रुग्णालयात उपस्थित असतांना संतापजनक घटना !

रांची (झारखंड) – येथे रुग्णालयात भरती होण्यासाठी आलेल्या कोरोना रुग्णाला अर्धा घंटा खाट उपलब्ध न झाल्याने त्याचा उपचारांविना मृत्यू झाला. हा रुग्ण राज्यातील हजारीबाग येथून उपचारांसाठी आला होता; मात्र रुग्णालयाच्या पायर्‍यांवरच त्याचा मृत्यू झाला.

After a long wait for medical attention, her #COVID19 infected father died in the hospital parking lot…#Jharkhand #Ranchi | @satyajeetAT https://t.co/ZFLuJnAI7o

— IndiaToday (@IndiaToday) April 14, 2021

कोरोनाबाधीत असलेल्या या रुग्णाला डॉक्टरांनी तपासले नाही. पीडित रुग्णाची मुलगी आणि नातेवाईक रुग्णालयातील डॉक्टरांना विनवण्या करत होते; मात्र कुणीही त्यांना दाद दिली नाही. राज्याचे आरोग्यमंत्री आणि काँग्रेसचे बन्ना गुप्ता हेही तेथे उपस्थित होते; मात्र तेसुद्धा त्यांच्यासमोरून निघून गेले. ‘येथील परिस्थिती सामान्य आहे’ असेही ते म्हणाले. प्रत्यक्षातही स्थिती या घटनेतून उघड झाली. ‘राजकारण्यांना केवळ मतांशी देणेघेणे आहे. ते मला माझे वडील परत मिळवून देऊ शकतात का?’, असा प्रश्‍न मृत रुग्णाच्या मुलीने विचारला आहे. हा प्रकार समजल्यावर मंत्री गुप्ता यांनी सारवासारव करत आरोग्य विभागाला दोष देत ‘असे प्रकार खपवून घेतले जाणार नाहीत’, अशी पोकळ चेतावणी दिली.