वाढे फाटा परिसरात लुटमारीच्या घटनांमध्ये वाढ !

सातारा, २३ मार्च (वार्ता.) – वाढे फाटा ते वेण्णा नदी पूल या अंतरामध्ये लुटमारीच्या घटना वाढत आहेत. १९ मार्चच्या रात्री संतोष उबाळे यांना ४ ते ५ अज्ञात व्यक्तींनी अडवून मारहाण केली. तसेच त्यांच्याकडून भ्रमणभाष, रोख रक्कम आणि पॅन्ट काढून घेतली. वाढे फाटा येथे वाहतूक पोलीस कर्मचारी असतात; मात्र सायंकाळी ६ नंतर येथे कुणीही नसते. त्यामुळे चोरांचे चांगलेच फावते आहे. त्यामुळे पायी चालणार्‍या पादचार्‍यांसह दुचाकी वाहनांवरून प्रवास करणार्‍या नागरिकांमध्ये भीतीचे वातावरण निर्माण झाले आहे.

वाढे फाटा परिसरातील वाढती गर्दी, राष्ट्रीय महामार्ग उड्डाणपुलाखालील परप्रांतीय नागरिकांचा वाढता वावर यांवर नियंत्रण ठेवण्यासाठी स्वतंत्र पोलीस गस्त पथक (वाहन) आणि स्वतंत्र पोलीस चौकीची मागणी वाढे फाटा परिसरातील नागरिक करत आहेत.