पंढरपूर (जिल्हा सोलापूर) येथे श्री विठ्ठल-रुक्मिणी यांचा विवाह सोहळा मोठ्या उत्साहात पार पडला

पंढरपूर (जिल्हा सोलापूर) – येथे मोठ्या उत्साहात आणि मोजक्या भाविकांच्या उपस्थितीत श्री विठ्ठल-रुक्मिणी यांचा विवाह सोहळा दुपारी १२ वाजता श्री विठ्ठल रुक्मिणी मंदिरात पार पडला. या सोहळ्यानिमित्त संपूर्ण मंदिर विविध प्रकारच्या ५ टन फुलांनी सजवण्यात आले होते. पुणे येथील भाविक भारत भुजबळ यांनी ही मनमोहक फुलांची सजावट केली होती.
रुक्मिणी स्वयंवर कथा सांगून या उत्सवास प्रारंभ झाला. दुपारी १२ वाजता श्री विठ्ठल आणि रुक्मिणी यांच्या प्रतिकात्मक मूर्ती सभामंडपात आणण्यात आल्या. त्यानंतर मंत्रोच्चार आणि मंगलाष्टक यांच्या गजरात उपस्थितांनी अक्षता वाहिल्या. या वेळी मंदिरातील वातावरण अधिकच मंगलमय झाले होते.