Ayodhya Mosque : मुसलमान समाजाच्या अनास्थेमुळे अयोध्या परिसरात भव्य मशीद बांधण्याचा प्रकल्प कोलमडला

लक्ष्मणपुरी (उत्तरप्रदेश) – सर्वोच्च न्यायालयाने ९ नोव्हेंबर २०१९ या दिवशी दिलेल्या ऐतिहासिक निकालात अयोध्येतील भूमी श्री रामलल्लाला देण्याचा निर्णय दिला आणि त्या बदल्यात सुन्नी वक्फ बोर्डाला मशीद बांधण्यासाठी अयोध्येतच ५ एकर पर्यायी भूमी देण्याचा आदेश दिला. या निर्णयानंतर मुसलमान समाजाची अनास्था आणि देणगीची तीव्र टंचाई यांमुळे धन्नीपूर येथे बांधला जाणारा मशीद प्रकल्प कोलमडला आहे. यामुळे मशिदीचा आकार अत्यंत लहान करण्यात आला आहे.

१. ‘इंडो-इस्लामिक कल्चरल फाऊंडेशन’ने मशिदीसह ५ एकर भूमीमध्ये रुग्णालय आणि ग्रंथालय यांसारख्या मोठा प्रकल्प राबवण्याचा निर्णय घेतला होता; मात्र हा निर्णय आता गुंडाळण्यात आला आहे.

२. सर्वाेच्च न्यायालयाच्या निर्णयानंतर उत्तरप्रदेश सरकारने अयोध्येतील धन्नीपूर गावात ५ एकर भूमी मुसलमान समाजाला दिली होती. ही जागा श्रीराममंदिरापासून अनुमाने २५ किलोमीटर अंतरावर लखनौ-गोरखपूर राष्ट्रीय महामार्गावर आहे.

३. ही लहान मशीद बांधण्यासाठीही किमान ३ कोटी ते ५ कोटी रुपयांच्या निधीची आवश्यकता आहे. अनेक प्रयत्न करूनही फाऊंडेशन आतापर्यंत केवळ १ कोटी ५ लाख रुपयांचीच देणगी गोळा करू शकले आहे. ही रक्कम या योजनेसाठी अल्प पडत आहे.