मोशी दुर्घटनेत अग्नीशमनदलाच्या कर्मचार्‍यांनी ९ जणांना वाचवले !

पिंपरी-चिंचवड – येथील मोशी येथे कचरा डेपोजवळ ‘वेस्ट टू एनर्जी’ (टाकाऊपासून ऊर्जा निर्मिती) प्रकल्पाची इमारत ८ जुलैला कोसळली दुर्घटना घडली आहे. अतीवृष्टीमुळे कचर्‍याच्या डोंगराचे भूस्खलन होऊन तो थेट ‘वेस्ट टू एनर्जी’ प्रकल्पाच्या प्रशासकीय इमारतीवर कोसळला. या दुर्घटनेत ढिगार्‍याखाली अडकलेल्या ९ जणांना अग्नीशमनदलाच्या कर्मचार्‍यांनी सुखरूप बाहेर काढले. अनिल वाघ, पुंडलिक भुतापल्ले यांच्यासह इतर ३ सहकार्‍यांनी स्वतःचा जीव धोक्यात घालत ९ जणांना वाचवले. अजूनही काही जण ढिगार्‍याखाली आहेत. या कर्मचार्‍यांनी दाखवलेले हे शौर्य सध्या संपूर्ण महाराष्ट्रात कौतुकाचा विषय ठरत आहे.

कर्मचारी अनिल वाघ आणि त्यांच्या गटाने सलग १४ घंटे इमारतीच्या आत राहून बचावाची कामगिरी पार पडली. कोसळलेला स्लॅब आणि कचर्‍याच्या ढिगार्‍यामुळे श्वासोच्छ्वास घेण्यासाठी अजिबात प्राणवायू शिल्लक नव्हता. अत्यंत प्रतिकूल वातावरणातही अनिल वाघ आणि त्यांचे सहकारी मागे हटले नाहीत.