सनातन प्रभात > Post Type > बातम्या > आंतरराष्ट्रीय बातम्या > FATF Vice Presidency : विवेक अग्रवाल यांची ‘एफ्.ए.टी.एफ्.’च्या उपाध्यक्षपदी निवड !

FATF Vice Presidency : विवेक अग्रवाल यांची ‘एफ्.ए.टी.एफ्.’च्या उपाध्यक्षपदी निवड !

आंतरराष्ट्रीय स्तरावर भारताचे ऐतिहासिक यश !

(एफ्.ए.टी.एफ्. म्हणजे फायनॅन्शियल अ‍ॅक्शन टास्क फोर्स, म्हणजेच आर्थिक कृती कार्य दल)

भारताचे वरिष्ठ ‘आय.ए.एस्.’ अधिकारी विवेक अग्रवाल

पॅरिस (फ्रान्स) – भारताला आंतरराष्ट्रीय स्तरावर एक मोठे यश मिळाले आहे. भारताचे वरिष्ठ ‘आय.ए.एस्.’ अधिकारी विवेक अग्रवाल यांची ‘एफ्.ए.टी.एफ्.’ या जागतिक संस्थेचे उपाध्यक्ष म्हणून निवड झाली आहे. एखाद्या भारतीय अधिकार्‍याला या प्रभावशाली जागतिक संस्थेत एवढे मोठे पद मिळण्याची ही पहिलीच वेळ आहे. येथे आयोजित या संस्थेच्या बैठकीत हा निर्णय घेण्यात आला. अग्रवाल हे मध्यप्रदेश ‘कॅडर’चे १९९४ च्या बॅचचे  ‘आय.ए.एस्.’ अधिकारी आहेत. ते सध्या भारत सरकारच्या संस्कृती मंत्रालयात सचिवपदावर कार्यरत आहेत.

१. ‘एफ्.ए.टी.एफ्.’चे उपाध्यक्ष म्हणून त्यांचा कार्यकाळ जुलै २०२६ ते जून २०२७ पर्यंत असेल. अग्रवाल यांना आर्थिक विषय आणि आंतरराष्ट्रीय नियम यांचा दांडगा अनुभव आहे.

२. ते यापूर्वी अर्थ मंत्रालयाच्या महसूल विभागात अतिरिक्त सचिव राहिले आहेत आणि ‘एफ्.ए.टी.एफ्.’मध्ये त्यांनी भारताचे प्रतिनिधित्वही केले आहे.

३. या नियुक्तीवर बोलतांना अग्रवाल म्हणाले की, ‘मनी लाँडरिंग’ (काळ्या पैशाला पांढरा करण्याची प्रक्रिया) आणि आतंकवाद यांना मिळणार्‍या निधीविरुद्धच्या भारताच्या सशक्त धोरणांना मिळालेली ही पावती आहे.

४. जागतिक आर्थिक व्यवस्था अधिक सुरक्षित आणि पारदर्शक बनवण्यासाठी आपण काम करू, असा विश्‍वास त्यांनी व्यक्त केला.

५. अलीकडच्या वर्षांत आर्थिक सुरक्षा आणि डिजिटल पेमेंट प्रणाली यांविषयी भारताच्या उत्तम कामगिरीमुळे जगाचा विश्‍वास आणखी दृढ झाला आहे.

संपादकीय भूमिका

या नियुक्तीमळे पाकिस्तान चवताळला, तर आश्‍चर्य नाही ! तथापि पाकिस्तानचे आर्थिक कंबरडे मोडण्यासाठी अग्रवाल यांच्या नेतृत्वाखाली ‘एफ्.ए.टी.एफ्.’ने कठोर निर्णय घ्यावेत, ही अपेक्षा !

नूतन लेख