US-Iran War : अमेरिका-इराण युद्ध संपणार !

वॉशिंग्टन/तेहरान – अमेरिकेचे राष्ट्राध्यक्ष डॉनल्ड ट्रम्प यांनी ‘ट्रुथ सोशल’ या सामाजिक माध्यमाद्वारे अमेरिका आणि इराण यांच्यात १४ सूत्री शांतता करार झाल्याची घोषणा केली. त्यामुळे अमेरिका आणि इराण यांच्यात गेल्या १०७ दिवसांपासून चालू असलेले युद्ध संपणार असल्याचे अंततः स्पष्ट झाले. १९ एप्रिलला स्विझर्लंडमधील जिनिव्हा शहरात ट्रम्प यांच्या उपस्थितीत या शांतता करारावर स्वाक्षरी करण्यात येणार आहे. त्यानंतर संयुक्त राष्ट्र सुरक्षा परिषद यावर अंतिम मोहोर उमटवेल आणि त्यानंतर या युद्धाची अधिकृत समाप्ती होईल.

हॉर्मुझची सामुद्रधुनीच्या भोवतीची नाकाबंदी हटवणार ! – ट्रम्प

हॉर्मुझची सामुद्रधुनीच्या (२ जलाशयांना जोडणार्‍या जलमार्गाच्या) भोवती अमेरिकेच्या नौदलाने केलेली नाकाबंदी पूर्णपणे हटवण्याचा आदेशही ट्रम्प यांनी त्यांच्या नौदलाला दिला आहे. त्यामुळे हॉर्मुझमधून पूर्वीप्रमाणे पुन्हा तेलवाहतूक होणार आहे. परिणामी जगभरातील अनेक देशांत निर्माण झालेले ऊर्जासंकट दूर होऊन ढासळलेल्या अर्थव्यवस्थेला हातभार लागणार आहे.

इराणने मौन बाळगळ्यामुळे शांतता कराराविषयी प्रश्नचिन्ह !

ट्रम्प यांनी केलेल्या घोषणेवर इराणने अद्याप अधिकृत प्रतिक्रिया व्यक्त केलेली नाही. पाकिस्ताननेही अमेरिका आणि इराण यांच्यात शांतता करार झाल्याचे सांगण्यात आले; परंतु इराणने त्यावरही कुठलीही प्रतिक्रिया व्यक्त केलेली नाही. त्यामुळे शांतता कराराविषयी प्रश्नचिन्ह कायम आहे.

डॉनल्ड ट्रम्प काय म्हणाले?

अमेरिकेचे राष्ट्राध्यक्ष  डॉनल्ड ट्रम्प यांनी त्यांच्या ‘ट्रुथ सोशल’ या सामाजिक माध्यमावरून अमेरिका आणि इराण यांच्यातील शांतता कराराची घोषणा केली आहे. ट्रम्प म्हणाले की, ‘इस्लामिक रिपब्लिक ऑफ इराणशी करार पूर्ण झाला आहे. सर्वांचे अभिनंदन. मी या माध्यमातून घोषणा करतो की, हॉर्मुझची सामुद्रधुनीही पुन्हा चालू होईल. मी अमेरिकी नौदलालाही नाकाबंदी हटवण्यास संमत्ती देत आहे. या सामुद्रधुनीतून इंधनाचा पुरवठा ज्या देशांना होतो, त्यांनी तेलवाहतूक चालू करावी.’

तेलाच्या किमतीत मोठ्या प्रमाणात घसरण : शेअर बाजारही सावरला

ट्रम्प यांच्या घोषणेमुळे तेलाच्या किमतीत मोठ्या प्रमाणात घसरण झाली असून तेलाचे प्रति बॅरल ८३ डॉलरपर्यंत (७ सहस्र ८५४ रुपयांपर्यंत) खाली आल्याचे सांगितले जात आहे. यासह गेल्या अनेक दिवसांपासून पडलेला शेअर बाजारही सावरला आहे.

इस्रायलला करार अमान्य !

अमेरिकेने केलेला हा करारा इस्रायलला पूर्णपणे मान्य नसल्याचे सांगण्यात येत आहे. विशेषतः अमेरिकेने लेबननवर आक्रमण थांबवण्याच्या केलेल्या करारावर इस्रायलचा आक्षेप असल्याचे सांगण्यात येते. या करारावरून इस्रायलच्या एका मंत्र्याने ‘इस्रायल अमेरिकाचा गुलाम नाही’, अशा शब्दांत संताप व्यक्त केला आहे.