Baba Milan Das : साधू राममिलन दास यांची हत्या करणारा इस्रायल पोलीस चकमकीत ठार

उन्नाव (उत्तरप्रदेश) – येथे साधू राममिलन दास उपाख्य बाबा मिलन दास सिंह यांची हत्या करणारा इस्रायल हा पोलिसांशी झालेल्या चकमकीत ठार झाला.

पोलिसांनी दिलेल्या माहितीनुसार इस्रायल आणि त्याचे सहकारी हे ताजपूर परिसरात येणार असल्याची माहिती पोलिसांना गोपनीय सूत्रांच्या आधारे मिळाली. त्यानुसार पोलिसांनी १५ जूनच्या पहाटे ४ वाजण्याच्या सुमारास या संपूर्ण परिसराला वेढा घातला. आपण कोंडीत सापडल्याचे कळताच इस्रायलने पोलिसांवर गोळीबार केला. प्रत्युत्तरात पोलिसांनी केलेल्या कारवाईत तो ठार झाला.

ध्वनीक्षेपकावरून भजन-कीर्तन करत असल्याने साधू राममिलन यांची हत्या !

इस्रायलने ९ जूनला त्याच्या साथीदारांसह उन्नावमधील बांगरमऊ परिसरात साधू राममिलन दास यांची चाकूने वार करून हत्या केली होती. साधू दास यांच्या कुटुंबियांनी आरोप केला आहे की, साधू मंदिरात भजन-कीर्तनासाठी ध्वनीक्षेपकाचा वापर करत असल्याचे काही कट्टरतावाद्यांना आवडत नव्हते आणि त्यामुळेच त्यांची हत्या करण्यात आली. साधूंच्या हत्येनंतर आरोपी पसार झाले. या घटनेनंतर कुटुंबियांनी न्यायाची मागणी चालूच ठेवली. पोलिसांनी आरोपीला पकडण्यासाठी एक लाख रुपयांचे पारितोषिकही घोषित केले होते. आता उर्वरित आरोपींवरही कठोर कारवाई करवी, अशी मागणी साधू राममिलन दास यांच्या कुटुंबियांनी पोलिसांकडे केली आहे.