बांगलादेशातील शिवगंज उपजिल्ह्याचे नाव पालटून ‘महास्थान’ होणार !

ढाका (बांगलादेश) – येथील गायबांधा जिल्ह्यातील ‘सनातन धर्म संकुला’च्या विरोधात कट्टरतावादी मुसलमानांनी आंदोलन, तसेच धमकावल्यामुळे बांगलादेश सरकारने त्याचे बांधकाम थांबवल्याची घटना ताजीच आहे. अशातच कट्टरतावाद्यांच्या मागणीसमोर झुकत प्रशासनाने बोगरा जिल्ह्यातील ‘शिवगंज’ उपजिल्ह्याचे नाव पालटून ‘महास्थान’ करण्याची प्रक्रिया चालू केल्याचे समोर आले आहे. या नावात असलेल्या हिंदु धार्मिक संदर्भामुळे आक्षेप घेण्यात आला होता. ‘प्रशासनाचे हे पाऊल म्हणजे देशाच्या ऐतिहासिक आणि धार्मिक ओळखीशी निगडित चिन्हे हळूहळू काढून टाकण्याच्या प्रक्रियेचा आरंभ आहे’, असे म्हटले जात आहे.

लक्ष्मीपूर, शंभूगंज, नारायणगंज, ब्राह्मणबारिया, जॉयपूरहाट, ठाकूरगाव आणि गोपालगंज या गावांचे नाव पालटण्याचेही षड्यंत्र !

सूत्रांनी दिलेल्या माहितीनुसार शिवगंजचे प्रकरण ही काही एकमेव घटना नाही. भविष्यात लक्ष्मीपूर, शंभूगंज, नारायणगंज, ब्राह्मणबारिया, जॉयपूरहाट, ठाकूरगाव आणि गोपालगंज यांसारख्या इतर ठिकाणांच्या नावांच्या संदर्भातही असाच दबाव आणला जाऊ शकतो, अशी भीती हिंदु समुदायाकडून व्यक्त केली जात आहे. जरी या विषयावर अद्याप कोणतेही अधिकृत राष्ट्रीय धोरण घोषित करण्यात आलेले नसले, तरी या चर्चांमुळे हिंदु समुदायात अस्वस्थता निर्माण झाली आहे.