ईश्वरपूर (जिल्हा सांगली) बसस्थानकावर अपुर्‍या फलाटांमुळे प्रवाशांचे हाल !

श्री. भीमराव खोत, पलूस

ईश्वरपूर, १३ जून (वार्ता.) – सांगली जिल्ह्यातील ईश्वरपूर हे महत्त्वाचे बसस्थानक आहे. या बसस्थानकावर फलाटांची संख्या अपुरी आहे. त्यामुळे वारणानगर, कोडोली, आष्टा, ताकारी, विटा, जुनेखेड, तासगाव आणि पलूस या मार्गांवरील बसगाड्या फलाटावर न थांबवता शेड नसलेल्या ठिकाणी थांबवल्या जातात. त्यामुळे प्रवाशांना रणरणत्या उन्हात या मार्गावरील गाड्यांची वाट पहात थांबावे लागते.

#Fix_MSRTC_BusStands_Now
Ground Report | Ishwarpur Bus Stand
❌ Inadequate number of platforms
❌ No shed or seating for passengers
❌ Dirty toilets
❌ Potholes & incomplete roads
❌ Overgrown grass & bushes
Immediate inspection and corrective action needed!@msrtcofficial… pic.twitter.com/3XYFMWQX4d

— Sanatan Prabhat (@SanatanPrabhat) June 17, 2026

पावसाळ्यातही प्रवाशांचे मोठ्या प्रमाणात हाल होतात. त्यामुळे ‘कुठली गाडी नेमकी कुठे लागणार ?’ असाही प्रश्न प्रवाशांना पडल्यामुळे त्यांची गैरसोय होते. गाडीची जागा पालटली, तर सामान घेऊन प्रवाशांना तिथे धावावे लागते. येथे प्रवाशांना ऊन लागू नये, म्हणून ना तात्पुरत्या छताची व्यवस्था करण्यात आली आहे, ना बसण्याची. त्यामुळे महिला, आबाल-वृद्ध, आजारी या प्रवाशांचीही गैरसोय होते. तेथील नारळाच्या झाड्याच्या थोड्या सावलीचा आधार घेऊन प्रवासी गाड्यांची वाट पहात थांबतात; परंतु प्रवाशांना होत असलेल्या या अडचणीकडे बस प्रशासनाचे मात्र पूर्ण दुर्लक्ष होत आहे.

१. बसस्थानकावरील प्रसाधनगृह अत्यंत अस्वच्छ आहे. येथे जायचे असेल, तर अक्षरश: नाक मुठीत धरून जावे लागते. त्यामुळे काही प्रवासी बसस्थानकाच्या परिसरात आडोशाच्या ठिकाणी लघुशंका करतात. येथील लाद्याही तुटलेल्या आहेत.

२.  बसस्थानकाच्या परिसरात अन्यत्र गवत वाढले आहे. बसस्थानकातील रस्त्यांचे काँक्रिटीकरण अपूर्ण आहे. बसस्थानकाच्या अर्ध्या भावार मुरुम टाकलेला आहे. त्या भागात अनेक खड्डे आहेत. काही भागात झुडपे वाढली आहेत.

३. ‘सनातन प्रभात’च्या प्रतिनिधीने ईश्वरपूर आगार व्यवस्थापक श्री. दिलीप ठोंबरे यांची भेट घेऊन त्यांना प्रवाशांना येणार्‍या अडचणींविषयी विचारले असता त्यांनी ‘त्रुटी दूर करण्याचा प्रयत्न करत आहोत’, असे सांगितले.

सकारात्मक गोष्टी

येथे पिण्याच्या पाण्याची सोय आहे. बसगाड्यांच्या वेळापत्रकांचा फलक, विविध योजनांचे फलक लावलेले आहेत. हिरकणी कक्ष आणि कर्मचारी विश्रांती कक्ष यांची स्थिती चांगली आहे. स्थानकातील बसगाड्यांची स्थितीही चांगली आहे.