सांगलीसह राज्यातील १२ बाजार समित्यांना ‘राष्ट्रीय बाजारपेठे’चा दर्जा !

सांगली – सांगलीसह राज्यातील १२ प्रमुख कृषी उत्पन्न बाजार समित्यांना आता ‘राष्ट्रीय बाजारपेठे’चा दर्जा देण्याचा निर्णय घेण्यात आला असून राज्यपालांनी या संदर्भातील वटहुकूमावर स्वाक्षरी केली आहे. या क्रांतीकारक निर्णयामुळे स्थानिक राजकीय नेत्यांच्या स्वार्थी राजकारणाला आणि मनमानी कारभाराला अटकाव बसणार आहे.

पहिल्या टप्प्यात सांगली, मुंबई, पुणे, सोलापूर, नागपूर, लातूर, छत्रपती संभाजीनगर, कोल्हापूर यांसह १२ बाजार समित्यांचा यामध्ये समावेश आहे. नव्या रचनेनुसार अध्यक्षपदी थेट राज्याचे पणनमंत्री असतील, तर उपाध्यक्षपदी पणन राज्यमंत्री असतील. १६ सदस्यांच्या नव्या मंडळात कृषी आयुक्त, पणन संचालक यांच्यासह ५ शेतकरी प्रतिनिधी, ३ व्यापारी प्रतिनिधी आणि इतर राज्यांचे प्रतिनिधी अन् आयात-निर्यात क्षेत्रातील तज्ञांचा समावेश असेल.

‘राष्ट्रीय बाजार’ दर्जासाठीचे निकष

बाजार समितीला हा दर्जा मिळण्यासाठी वार्षिक शेतमाल आवक ८ लाख ३ सहस्र मेट्रिक टनांहून अधिक असणे आणि देशातील किमान २ किंवा त्याहून अधिक राज्यांतून तेथे शेतमालाची आवक होणे बंधनकारक आहे.