मुंबई, पुणे महापौर कार्यालय आणि संघाचे मुख्यालय उडवून देऊ ! – ‘खलिस्तान नॅशनल आर्मी’च्या नावाने धमकीचे ई-मेल

पुणे – मुंबई-पुण्याचे महापौर कार्यालय आणि नागपूरमधील रा. स्व. संघ मुख्यालय बॉंबने उडवून देण्याची धमकी मिळाली आहे. तसेच कर्णावती (अहमदाबाद) आणि गांधीनगर येथे १० जून ते २० सप्टेंबर या कालावधीमध्ये वेगवेगळ्या ठिकाणी बाँबस्फोट घडवण्याच्या गंभीर धमकीचे ई-मेल मिळाले आहेत. ‘खलिस्तान नॅशनल आर्मी’च्या नावाने ही धमकी देण्यात आली आहे. त्यामुळे सुरक्षा यंत्रणांकडून कसून अन्वेषण चालू असून संवेदनशील भागांत सुरक्षा कडक करण्यात आली आहे. या धमकीच्या ई-मेलमध्ये केवळ मुंबई-पुणे महापौर कार्यालयच नव्हे, तर नागपूरमधील काही संवेदनशील ठिकाणे  लक्ष्य करण्याची धमकी देण्यात आली आहे. यात आयईडी बाँबस्फोटाचा स्पष्ट उल्लेख करण्यात आला असून हा घातपात घडवून आणण्यासाठी काही विशिष्ट वेळा आणि दिनांक यांचाही संशयास्पद संदर्भ या ई-मेलमध्ये देण्यात आला आहे. (भारताचे तुकडे करू पहाणार्‍या देशविघातक शक्ती अजूनही देशात सक्रीय आहेत आणि त्यांचे धागेदोरे कुठे-कुठे पसरले आहेत, हेच यातून पुन्हा एकदा स्पष्ट होते. अशा धमक्या देण्याचे धाडस कुणाचे होणार नाही, अशी जरब बसवणे आता आवश्यक आहे. – संपादक)