Shamli Conversion : कोट्यधीश हिंदूच्या मुलाच्या धर्मांतराच्या प्रकरणात मुसलमान महिला व्यायाम प्रशिक्षक आणि तिचे वडील यांना अटक

शामली (उत्तरप्रदेश) – जिल्ह्यात आयुष मलिक नावाच्या २७ वर्षीय औषधांच्या दुकानाच्या मालकाचे फसवणूक करून, तसेच त्याचे बलपूर्वक धर्मांतर केल्याच्या प्रकरणी पोलिसांनी महिला व्यायाम प्रशिक्षक चांदणी कुरेशी आणि तिचे वडील इस्लाम कुरेशी यांना अटक केली. आयुष मलिक हा त्याच्या वडिलांचा एकुलता मुलगा असून ते कोट्यधीश आहे. त्यांच्या संपत्तीवर डोळा ठेवून चांदणी कुरेशी हिने आयुष याला प्रेमाच्या जाळ्यात ओढल्याचे सांगितले जात आहे.

१. पीडित तरुण आयुष मलिक हा अनुमाने ५ वर्षांपूर्वी ‘कुरेशी प्लस’ नावाच्या स्थानिक जिममध्ये जात होता. तिथे २५ वर्षीय चांदणी कुरेशी ही प्रशिक्षक म्हणून कार्यरत होती.

२. चांदणीने एका नियोजित कटांतर्गत आयुषला प्रेमाच्या जाळ्यात ओढले, असा आरोप आयुषचे वडील देवराज मलिक यांनी केला आहे. तसेच लग्न करण्यासाठी तिने आयुषवर इस्लाम धर्म स्वीकारण्याचा तीव्र दबाव आणला.

३. दोघांनी बनावट कागदपत्रांच्या आधारे देहली गुपचूप ‘निकाह’ (इस्लामी पद्धतीने विवाह) केला. त्यानंतर आयुषचे नाव पालटून महंमद अली ठेवण्यात आले.

४. आयुषच्या पालटलेल्या रहाणीमानामुळे कुटुंबाला संशय आला. शामलीचे पोलीस अधीक्षक नरेंद्र प्रताप सिंह यांनी सांगितले की, आयुषला पाकिस्तानी धर्मोपदेशक डॉ. इस्रार अहमद यांच्या चिथावणीखोर भाषणांचे यू ट्यूब व्हिडिओ दाखवून प्रभावित करण्यात आल्याचे समोर आले आहे.

५. पोलिसांनी या प्रकरणात ३ मौलवींसह एकूण ९ ते १० जणांविरुद्ध गुन्हा नोंदवला आहे. त्यांच्या विरोधात भारतीय न्याय संहिता आणि ‘उत्तरप्रदेश बेकायदेशीर धर्मांतर प्रतिबंधक कायद्या’च्या अंतर्गत खंडणी गोळा करणे (कलम ३०८) फसवणूक (कलम ३१८) बनावट कागदपत्रे बनवणे (कलम ३३६, ३३८) गुन्हेगारी धमकी देणे (कलम ३५१) आदी कलमांखाली गुन्हा नोंदवण्यात आला आहे.

६. या प्रकरणामागे मोठी यंत्रणा कार्यरत आहे का ?, हे शोधण्यासाठी पोलिसांनी एक विशेष अन्वेषण पथक स्थापन केले आहे.

७. स्थानिक हिंदु संघटनांनी या घटनेचा तीव्र निषेध करत आंदोलनाची चेतावणी दिली  आहे. सध्या पोलिसांच्या भीतीमुळे किंवा दबावामुळे आयुष मलिक अज्ञात ठिकाणी निघून गेला असून पोलीस त्याचा शोध घेत आहेत.