मडगावच्या नागरिकाची ऑनलाईन फसवणूक

एकाला अटक

पणजी – बनावट ‘शेअर ट्रेडिंग ॲप’द्वारे (समभाग व्यापार ॲपद्वारे) मडगावच्या रहिवाशाची २ कोटी ९ लाख रुपयांची फसवणूक केल्याप्रकरणी महाराष्ट्रातील ठाणे येथील २५ वर्षांच्या तरुणाला गोवा सायबर गुन्हे पोलिसांनी अटक केली आहे. पोलिसांनी आरोपीची ओळख मयूर वाघे (नालासोपारा, वसई, ठाणे) अशी पटवली आहे. या प्रकरणी ८ मे या दिवशी गुन्हा नोंद करण्यात आला होता. पोलिसांच्या माहितीनुसार आरोपी आणि त्याच्या साथीदारांनी ‘एंजल वन’ ट्रेडिंग प्लॅटफॉर्मचे प्रतिनिधी असल्याचे भासवून अनेक व्हॉट्सॲप क्रमांकांवरून तक्रारदाराशी संपर्क साधला आणि समभाग बाजारात अधिक परतावा देण्याचे आमीष दाखवून ‘ट्रेंडलिटिक’ नावाच्या बनावट ॲपद्वारे गुंतवणूक करण्यास त्याला प्रवृत्त केले. तक्रारदाराने एकूण २ कोटी ९ लाख ७८ सहस्र ६१२ रुपये वेगवेगळ्या बँक खात्यांमध्ये हस्तांतरित केले होते.