पान मसाला, गुटखा आणि भेसळीचे अन्नपदार्थ यांचा दीड कोटीहून अधिक किमतीचा साठा जप्त

मुंबई – राज्यातील प्रतिबंधित पान मसाला, गुटखा, भेसळ अन्नपदार्थ यांच्या विरोधात अन्न आणि औषध प्रशासनाने राज्यभर ७ दिवस धडक मोहीम राबवत १ कोटी ५८ लाख २८ सहस्र ६७७ रुपयांचा साठा जप्त केला असून १०२ व्यक्तींना अटक केली. एकूण २०३ आस्थापनांवर कारवाई केली. तसेच ८६ आस्थापनांना टाळे ठोकण्यात आले. (या आस्थापनांविषयी कुणालाही काहीच ठाऊक नव्हते, असे म्हणणे धाडसाचे ठरेल. त्यांच्यावर कारवाई होणार का ? – संपादक)

अन्न आणि औषध प्रशासनाच्या ‘सेफ फूड, सेफ ड्रग, सेफ महाराष्ट्र’ (सुरक्षित अन्न, सुरक्षित औषधे आणि सुरक्षित महाराष्ट्र) या संकल्पनेअंतर्गत राज्यभर भेसळ, अस्वच्छ अन्न उत्पादक आणि नियमभंग करणार्‍या अन्न व्यवसायिकांविरुद्ध विशेष मोहीम राबवण्यात आली. भेसळयुक्त पदार्थाांमध्ये आंबे, बुंदी लाडू, खवा, बेकरी पदार्थ, कँडी, दूध आणि दुग्धजन्य पदार्थ, गूळ, खाद्यतेल, तूप, खजूर, आईस्क्रीम, कुल्फी, फ्रोजन डेझर्ट, मसाले, शेंगदाणा चिक्की, तसेच भेसळीसाठी वापरल्या जाणार्‍या पदार्थांचा समावेश होता.