बाणेर येथे महापालिकेच्या सुविधा वापरून चालणार्‍या रुग्णालयात रुग्णांची लूट !

पुणे – बाणेर येथे सर्व्हे क्रमांक ३३ मध्ये महापालिकेने ४० कोटी रुपये खर्चून २५ सहस्र चौरस फुटांची अद्ययावत् इमारत उभारली; मात्र ही सर्व मालमत्ता ५०० रुपयांच्या ‘स्टँप पेपर’वर (शासकीय शुल्काच्या कागदावर) एका फाऊंडेशनला रुग्णालय चालवण्यासाठी दिली. महापालिकेच्या नियमानुसार कोणतीही मालमत्ता विनाभाडे देता येत नाही. तरीही हा निर्णय घेतल्याचा आरोप नगरसेवक अमोल बालवडकर यांनी केला. ज्या संस्थेला ही इमारत दिली त्या संस्थेची धर्मादाय आयुक्त कार्यालयाकडे कोणतीही नोंद नाही.

महापालिकेच्या सुविधा वापरून हे रुग्णालय चालवले जात असतांना रुग्णांची लूट होत आहे. राज्य सरकारच्या लोकोपयोगी आरोग्य योजनाही येथे राबवल्या जात नाहीत, असा आरोप बालवडकर यांनी केला. बाणेर येथे महापालिकेच्या इमारतीत चालू असलेल्या रुग्णालयाला नोटीस बजावली असून त्यांची चौकशी होईल. अहवाल प्राप्त झाल्यानंतर पुढील कार्यवाही होईल, असे महापालिकेच्या आरोग्य विभागाच्या प्रमुख डॉ. नीना बोराडे यांनी सांगितले.