Nashik Kumbh Mela 2027 : नाशिक-त्र्यंबकेश्वर सिंहस्थ कुंभपर्वाच्या बोधचिन्हाचे मुख्यमंत्र्यांच्या हस्ते अनावरण !

मुंबई – नाशिक-त्र्यंबकेश्वर येथे वर्ष २०२७ मध्ये होणार्‍या सिंहस्थ कुंभपर्वाच्या बोधचिन्हाचे अनावरण सह्याद्री अतिथीगृह येथे झालेल्या कार्यक्रमात मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा अजित पवार यांच्या हस्ते करण्यात आले. कुंभपर्वाच्या बोधचिन्हासाठी ‘कुंभमेळा प्राधिकरणा’च्या वतीने स्पर्धेचे आयोजन करण्यात आले होते.

या स्पर्धेत अनुमाने ३ सहस्रांहून अधिक स्पर्धकांनी सहभाग घेतला. या स्पर्धकांमधून ३ उत्कृष्ट स्पर्धकांचा मुख्यमंत्र्यांच्या हस्ते सत्कार करण्यात आला. यामध्ये प्रथम क्रमांक मिळवलेल्या पुणे येथील सुमित काटे यांना ३ लाख रुपयांचा धनादेश आणि सन्मानचिन्ह, द्वितीय क्रमांक पटकावलेल्या नोएडा येथील मयांक नायक यांना २ लाख रुपयांचा धनादेश आणि सन्मानचिन्ह, तर तृतीय क्रमांक पटकावलेल्या पंढरपूर येथील पियुष पिंपळनेरकर यांना १ लाख रुपयांचा धनादेश अन् सन्मानचिन्ह देऊन सन्मानित करण्यात आले. प्राधिकरणाचे आयुक्त शेखर सिंह यांनी प्रास्ताविकाद्वारे कुंभपर्वाच्या आयोजनाविषयी माहिती दिली.

या वेळी विविध आखाड्यांचे साधू-संत उपस्थित होते. मुख्यमंत्री आणि उपमुख्यमंत्री यांनी उपस्थित साधू-संतांचे स्वागत केले.

बोधचिन्हाचे महत्त्व ! कुंभपर्वाचे बोधचिन्ह नाशिक आणि त्र्यंबकेश्वर येथील धार्मिक परंपरावर आधारित आहे. या बोधचिन्हात भगवान शंकराचे त्रिशूळ असून ते आध्यात्मिक ऊर्जेचे प्रतीक आहे. त्र्यंबकेश्वर मंदिर म्हणजे प्रादेशिक वारशाचे दर्शन घडवणारी मंदिराची प्रतिकृती आहे. बोधचिन्हात काळाराम मंदिराची कमान दाखवलेली आहे. गोदावरी नदीचे वैशिष्ट्य म्हणजे नदीला ‘शिवलिंगा’च्या रूपात दाखवण्यात आले असून त्याद्वारे कुंभपर्वातील पवित्र अमृत (शाही) स्नानाच्या परंपरेचे महत्त्व अधोरेखित करण्यात आले आहे.