सनातन प्रभात > Post Type > बातम्या > राष्ट्रीय बातम्या > Kajal Hindusthani : प्रखर हिंदुत्वनिष्ठ काजल हिंदुस्थानी यांनी रामनाथी, गोवा येथील ‘सनातन आश्रमा’ला दिली सदिच्छा भेट !

Kajal Hindusthani : प्रखर हिंदुत्वनिष्ठ काजल हिंदुस्थानी यांनी रामनाथी, गोवा येथील ‘सनातन आश्रमा’ला दिली सदिच्छा भेट !

रामनाथी (फोंडा, गोवा) – गुजरातमधील प्रखर हिंदुत्वनिष्ठ आणि ‘सोशल मिडिया इन्फ्लुएन्सर’ (सामाजिक माध्यमांच्या माध्यमातून प्रभावीपणे समाजाला दिशा देणार्‍या) काजल हिंदुस्थानी यांनी १८ एप्रिल २०२६ या दिवशी रामनाथी, गोवा येथील सनातन संस्थेच्या आश्रमाला सदिच्छा भेट दिली. या वेळी सनातनच्या साधिका सौ. निशिगंधा नाफडे यांनी काजल हिंदुस्थानी यांना आश्रमात चालणार्‍या राष्ट्र-धर्म कार्याची माहिती सांगितली.

साधनेमुळे निर्माण झालेली ऊर्जा समष्टीसाठी उपयोगात आणावी ! – काजल हिंदुस्थानी

आश्रम आणि कार्य यांच्याविषयीची माहिती जाणून घेतल्यानंतर साधकांशी संवाद साधतांना काजल हिंदुस्थानी म्हणाल्या, ‘‘तुमच्या महान गुरूंमुळे तुमच्यामध्ये साधनेची ऊर्जा निर्माण झाली आहे. ही ऊर्जा समष्टीसाठी उपयोगात आणायला हवी. लव्ह जिहाद, तसेच इतरही माध्यमातून सध्या महिलांवर मोठ्या प्रमाणात आघात होत आहेत. त्याच्या प्रतिकारासाठी महिला वर्गानेच पुढे आले पाहिजे. महिलांमध्ये अन्यायाचा प्रतिकार करण्याची उपजत क्षमता असते. या क्षमतेचा उपयोग दुष्प्रवृत्तीच्या विरोधात करण्याची वेळ आली आहे.’’

अहंकारविरहित आणि ईश्वराचे अधिष्ठान ठेवून कार्य करणे अपेक्षित !

कोणतेही कार्य करतांना ते अहंकारविरहित आणि ईश्वराचे अधिष्ठान ठेवून करणे आवश्यक आहे. ‘मी काहीच करत नाही, तर श्री महादेव आणि श्री लक्ष्मीमाता हेच माझ्याकडून कार्य करवून घेत आहेत. त्यामुळेच पुष्कळ विरोध होऊनही आणि माझ्या विरोधात अनेक तक्रारी होऊनही मी आज राष्ट्र-धर्मासाठी समर्पित भावाने कार्य करू शकत आहे, असेही त्या म्हणाल्या.

या वेळी त्यांनी ध्यानधारणेमुळे त्यांना आलेली श्री महादेवाच्या शक्तीची अनुभूतीही सांगितली. त्यांना डोकेदुखीचा एक दुर्धर आजार होता. अनेक औषधोपचार करूनही तो बरा होत नव्हता. याविषयी त्या म्हणाल्या, ‘‘एकदा मी ध्यान लावले, तेव्हा मला या आजारावरील उपाय माझ्या आतमध्येच आहे’, असे एक दैवी शक्ती सांगत असल्याचे जाणवले. नंतर मी ध्यानधारणेची ऊर्जा आजारावर उपचार करण्यासाठी उपयोगात आणली, तेव्हा हा आजार ९० टक्के उणावल्याचे मी अनुभवले. अजूनही जेव्हा आजार डोके वर काढतो, तेव्हा ध्यान लावून मी तो नियंत्रणात आणते.’’

नूतन लेख