घाटकोपरचे प.पू. जोशीबाबा आणि त्यांचे कुटुंबीय यांचा प.पू. भक्तराज महाराज यांच्याशी असलेला स्नेह अन् प.पू. बाबा आणि प.पू. दादा यांच्या पादुका दर्शनाच्या कार्यक्रमात श्रीमती वनिता जोशी यांची झालेली भेट !

अनेक वर्षांनी झालेली श्रीमती वनिता विजय जोशी (वय ७१ वर्षे) (प.पू. विजय जोशीबाबा यांच्या पत्नी) यांची भेट !

१. प.पू. जोशीबाबांच्या घरी दत्तजयंतीच्या उत्सवाला प.पू. पराशर जोशीबाबांच्या पू. आईंची भेट होत असणे, खारघरच्या कार्यक्रमात बर्‍याच वर्षांनी त्यांना पाहिल्यावर त्यांचा तेजःपुंज चेहरा पाहून आश्चर्य वाटणे

घाटकोपरला प.पू. जोशीबाबांच्या घरी दत्तजयंतीचा उत्सव व्हायचा. त्या उत्सवाला माझे जाणे व्हायचे. तेव्हा त्यांच्या पू. आईंची (श्रीमती वनिता जोशी यांची) भेट व्हायची. प.पू. विजय जोशीबाबांच्या निर्वाणानंतर त्या थकलेल्या वाटायच्या. त्यानंतर बरीच वर्षे त्यांची आणि माझी भेट होऊ शकली नाही; पण खारघर येथील कार्यक्रमात त्या प.पू. पराशर बाबांबरोबर आल्या होत्या. तेव्हा त्यांना बघून मी आश्चर्यचकित झाले. त्यांचा चेहरा तेजःपुंज दिसत होता. मी एक-दोघांशी त्याबद्दल बोलले, तर त्यांनाही तसेच वाटले होते.

२. प.पू. डॉ. आठवले यांना श्रीमती जोशी यांचे छायाचित्र दाखवल्यावर त्यांनी ‘छायाचित्र बघून पुष्कळ चांगले वाटले’, असे सांगणे

मी ही गोष्ट डॉक्टरांना दूरभाष करून सांगितली. तेव्हा त्यांनी ‘‘त्यांचे छायाचित्र पाठवा, तसेच ‘त्या काय साधना करतात ?’, ते लिहून पाठवा’’, असे सांगितले. गोव्याला आल्यावर मी त्यांना छायाचित्र आणि प.पू. पराशरबाबांनी पाठवलेले लिखाण दाखवले. तेव्हा डॉक्टर म्हणाले, ‘‘छायाचित्र बघून पुष्कळ चांगले वाटले. आपण हे छापूया. लोकांना कळू दे.’’

३. श्रीमती वनिता जोशी करत असलेली साधना आणि त्यांना साधू-संतांचा लाभलेला सत्संग

३ अ. श्रीमती वनिता जोशी यांनी शंकर आणि विष्णु या देवतांची उपासना, तसेच दत्तगुरु अन् कुलदेव यांचे नामस्मरण करतांना दुःखपीडित लोकांची मनोभावे सेवा करणे : श्रीमती वनिता जोशी यांनी शंकर आणि विष्णु या देवतांची उपासना केली आहे. त्या दत्तगुरु आणि कुलदेव यांचे नामस्मरण करतात. त्या शिवस्तुती आणि व्यंकटेशस्तोत्र यांचे नित्य पठण करतात, तसेच शिवलीलामृताचा ११ वा अध्याय आणि त्यातील नित्य पाठाच्या ४२ ओव्या यांचे नियमित पाठ करतात. आयुष्यभर घरी आलेल्या दुःखपीडित लोकांची सेवा मनोभावाने करणे, हे त्यांनी स्वत:चे प्रमुख कर्तव्य समजले. त्यांनी सासरे (मोठे जोशीबाबा), यजमान (प.पू. विजय जोशीबाबा) आणि मुलगा (प.पू. पराशर जोशीबाबा) या सगळ्यांच्या आध्यात्मिक कार्यात त्यांच्या सोबत राहून त्यांना सहकार्य केले आहे.

३ आ. साधू-संतांचा लाभलेला सत्संग : श्रीमती वनिता जोशी यांना पीर सय्यद हुसेनमिया कादरी नक्षबंदी, प.पू. भक्तराज महाराज, प.पू. रामानंद महाराज, काटोलचे प.पू. गुलाबबाबा, परमहंस भालचंद्र महाराज, योगिराज डॉ. राज अहमद हुसेनशाह पटेल, प.पू. डॉ. आठवले, डॉ. (सौ.) कुंदा जयंत आठवले, प.पू. दत्तात्रेय जोशीबाबा (मोठे जोशीबाबा) आणि प.पू. विजय जोशीबाबा (मधले जोशीबाबा), परमानंद महाराज, प.पू. काणे महाराज, सियाराम महाराज आदी साधू-संतांचा सहवास आणि आशीर्वाद लाभला आहे.

३ इ . त्यांना तळोजा (जि. रायगड) येथील घरी प.पू. भक्तराज महाराज यांना दूध-पाण्याने स्नान घालण्याची संधी मिळाली होती.’

– डॉ. (सौ.) कुंदा जयंत आठवले (७.३.२०२६)