एकटेपणाचा अपलाभ घेत अहिल्यानगर येथे शिक्षकाचा अल्पवयीन विद्यार्थिनीवर वारंवार अत्याचार !

अहिल्यानगर – येथील घारगाव परिसरातील शाळेत शिक्षकानेच विद्यार्थिनीवर वारंवार अत्याचार केला आहे. मानसिकदृष्ट्या खचलेल्या आठवीतील विद्यार्थिनीच्या एकटेपणाचा अपलाभ घेत अत्याचार करणार्‍या अमोल भोसले या शिक्षकाला या प्रकरणी अटक करण्यात आली आहे, तसेच घारगाव पोलीस ठाण्यात गुन्हा नोंद करण्यात आला आहे. पीडित मुलगी गर्भवती असल्याचे वैद्यकीय पडताळणीत निष्पन्न झाल्यानंतर हा प्रकार उघड झाला.

तक्रारीनुसार डिसेंबर २०२४ ते जानेवारी २०२६ या कालावधीत मुलगी घरी एकटी असतांना आरोपी तिच्या घरी जात असे आणि तिच्यावर वारंवार अत्याचार करत असे. गेल्या २ वर्षांपासून चालू असलेला हा प्रकार कुणाच्याही लक्षात आला नव्हता. काही दिवसांपूर्वी मुलीला पोटदुखीची तक्रार चालू झाली. उपचारासाठी तिला पिंपरी-चिंचवड येथील रुग्णालयात नेले असता ती गर्भवती असल्याचे स्पष्ट झाले.