मुंबई विमानतळावर ५ कोटी रुपयांचे सोने जप्त, ७ जणांना अटक !

मुंबई – मुंबई विमानतळावर ७ जून या दिवशी ५ कोटी रुपयांचे ३.२ किलो सोने जप्त करण्यात आले आहे. महसूल गुप्तचर संचालनालयाने ही कारवाई केली. या प्रकरणात बांगलादेश आणि श्रीलंका येथील ३ जण, विमानतळाचे ३ कर्मचारी आणि विमानतळावरून त्यांना नेण्यासाठी आलेला १ नागरिक अशा ७ जणांना अटक करण्यात आली आहे. बँकॉकमधून हे नागरिक शरीरातून सोन्याची तस्करी करत होते. विमानतळावर आल्यावर त्यांच्या शरीरातील सोने विमानतळावरील कर्मचारी काढून स्थानिक दलालाकडून हे सोने विमानतळाबाहेर काढण्याचा प्रयत्न करण्यात येत होता, अशी माहिती संचालनालयाकडून देण्यात आली आहे.