शंकराचार्य स्वामी अविमुक्तेश्वरानंद यांना संगमस्थळी स्नानाला जाण्यापासून रोखल्याने तणाव

मौनी अमावास्येला प्रयागराज येथील त्रिवेणी संगमाच्या तटावर वाद

प्रयागराज (उत्तरप्रदेश) – मौनी अमावास्येच्या दिवशी येथील त्रिवेणी संगमस्थळी स्नानासाठी निघालेले ज्योतिष पीठाचे शंकराचार्य स्वामी अविमुक्तेश्वरानंद सरस्वती यांना त्यांच्या रथासह पोलिसांनी संगमाकडे जाण्यापासून रोखले. रथ आणि मिरवणूक मार्गातच थांबवण्यात आल्याने वातावरण तणावपूर्ण झाले. रथ अडवल्यानंतर शंकराचार्यांचे समर्थक साधू-संत आणि पोलीस यांच्यात तीव्र शाब्दिक वाद झाला. शंकराचार्यांनी पोलीस आणि मेळा प्रशासन यांवर मनमानी अन् दडपशाही केल्याचा आरोप केला.

पोलिसांशी झालेल्या वादानंतर मोठ्या संख्येने अधिकारी पोलीस दलासह संगम तटावर पोचले. पोलिसांनी शंकराचार्य अविमुक्तेश्वरानंद यांना रथातून खाली उतरण्याची अनुमती दिली नाही. पोलिसांनी ५ जणांसह जाऊन स्नान करण्याचे निर्देश दिले. यावर शंकराचार्यांनी आक्षेप घेतला आणि प्रशासनाचा पवित्रा मनमानी असल्याचे सांगितले. या घटनेनंतर संपूर्ण संगम क्षेत्र पोलीस छावणीसारखे बनले. पोलिसांनी २० पेक्षा अधिक साधूंना धक्काबुक्की केल्यावरून कह्यात घेतले. गृह सचिव मोहित गुप्ता, मंडलायुक्त सौम्या अग्रवाल, पोलीस आयुक्त जोगेंद्र कुमार, मेळाधिकारी ऋषिराज यांच्यासह अनेक वरिष्ठ अधिकारी घटनास्थळी पोचले.