मकरसंक्रांतीनिमित्त श्री विठ्ठल मंदिरात महिला भाविकांच्या दर्शनासाठी विशेष नियोजन

पुरुषांनी मुखदर्शन घेण्याचे मंदिर समितीचे आवाहन

पंढरपूर – येथील श्री विठ्ठल–रुक्मिणी मंदिरात मकरसंक्रांतीनिमित्त महिला भाविकांना सुलभ दर्शन मिळावे, यासाठी विशेष नियोजन करण्यात आले आहे. भोगी दिनी, म्हणजेच १३ जानेवारी या दिवशी पहाटे श्री रुक्मिणी मातेची काकडा आरती आणि नित्यपूजा झाल्यानंतर महिलांना भोगी करण्याची विशेष व्यवस्था करण्यात आली आहे. मकरसंक्रांतीच्या दिवशी अधिकाधिक माता आणि भगिनी यांना दर्शनाचा लाभ मिळावा, यासाठी पुरुष भाविकांनी शक्यतो मुखदर्शन घ्यावे, असे आवाहन कार्यकारी अधिकारी राजेंद्र शेळके यांनी केले आहे. या कालावधीत गर्दी नियंत्रणासाठी दर्शनरांग व्यवस्थापन, स्वच्छता, महनीय व्यक्तींच्या दर्शनावर निर्बंध आदी उपाययोजना राबवण्यात येत असल्याची माहिती मंदिर समितीने दिली आहे.