Ataur Rahman Bikrampuri : बांगलादेशातील नॅशनल सिटिझन पार्टी आणि जमात-ए-इस्लामी यांचे काही नेते आतंकवादी कारवायांत सहभागी ! – मौलाना अताउर रहमान बिक्रमपुरी

मौलाना अताउर रहमान बिक्रमपुरी याचा आरोप

ढाका (बांगलादेश) – बांगलादेशात मौलाना अताउर रहमान बिक्रमपुरी याने चिथावणीखोर विधाने केल्यावरून अटक होण्यापूर्वी फेसबुकवरून एक व्हिडिओ प्रसारित केला. यात त्याने दावा केला आहे की, ‘नॅशनल सिटिझन पार्टी (एन्सीपी) आणि जमात-ए-इस्लामी यांचे काही नेते आतंकवादी कारवायांत सहभागी आहेत. या दोन्ही पक्षांतील काही नेत्यांचा बांगलादेशात अस्थिरता निर्माण करण्यात सहभाग आहे.’ रहमान याने एन्सीपीशी संबंधित विद्यार्थी नेत्यांवर देशात अलीकडे झालेल्या हिंसाचाराचा कट रचल्याचा आरोप केला.

वर्ष २०२१ मध्ये अताउर रहमान याला बंदी घालण्यात आलेल्या ‘अंसारुल्लाह बांग्ला टीम’ या आतंकवादी संघटनेचा सदस्य म्हणून अटक करण्यात आली होती. तो अनेक वेळा ‘तौहीदी जनता’ या नावाने चालू झालेल्या आंदोलनांत सहभागी झाला होता.  अताउर रहमान ‘अँटी शतीम मूव्हमेंट’ नावाचे एक फेसबुक पानही चालवतो.