वादग्रस्त ‘सनबर्न’वर बंदी घाला !  

दादर (मुंबई) येथील आंदोलनात विद्यार्थ्यांचा सहभाग

मुंबई – शिवडी येथे १९ ते २१ डिसेंबरला होणार्‍या ‘सनबर्न फेस्टिव्हल’ या वादग्रस्त पाश्चात्त्य संगीताच्या कार्यक्रमाचा इतिहास अमली पदार्थांचे अतीसेवन, युवकांचे मृत्यू, अश्लीलता असा आहे. याच्या आयोजकांनी शासनाचा कोट्यवधी रुपयांचा कर बुडवला आहे. हा कार्यक्रम रहित करण्यासाठी ‘नशाविरोधी संघर्ष अभियाना’च्या वतीने दादर (पूर्व) येथील रेल्वेस्थानकाच्या बाहेर आंदोलन करण्यात आले. यामध्ये युवक आणि राष्ट्रप्रेमी नागरिकांनी ‘सनबर्न’ला तीव्र विरोध दर्शवला.

अमली पदार्थांशी संबंधित या फेस्टिव्हलच्या विरोधात सरकार ‘शून्य सहनशीलते’ची भूमिका का घेत नाही ? – धनश्री केळशीकर, सदस्या, नशा विरोधी संघर्ष अभियान

गोवा सरकारने स्थानिक ग्रामस्थांच्या विरोधामुळे अमली पदार्थामुळे झालेले मृत्यू आणि अनैतिक कृत्यांच्या इतिहासामुळे या सनबर्नच्या आयोजकांना तिथून हाकलून लावले आहे. असे असतांना सरकार अमली पदार्थांसाठी ओळखल्या जाणार्‍या या कार्यक्रमाच्या संदर्भात शून्य सहनशीलतेची भूमिका का घेत नाही ? अमली पदार्थांच्या वापरासाठी कुप्रसिद्ध असलेला हा कार्यक्रम मुंबईत होऊ देणे, हा शुद्ध ढोंगीपणा आहे. त्यामुळे सनबर्न फेस्टिव्हल कायमचा बंद झाला पाहिजे, हीच आमची मागणी आहे.

क्षणचित्रे

१. नशा विरोधी संघर्ष अभियानाच्या या आंदोलनात ‘सनबर्न हटवा देश वाचवा’, ‘भारतमाता की जय’, ‘वन्दे मातरम’, ‘छत्रपती शिवाजी महाराज की जय’ अशा घोषणा देण्यात आल्या.

२. आंदोलकांनी ‘सनबर्न’ला विरोध करणारे फलक हातात धरले होते.

अनेक मान्यवर आणि संघटना यांचा सहभाग

मुंबई उच्च न्यायालयाचे अधिवक्ता राहुल पाटकर; शिवसेनेच्या महिला पदाधिकारी;  मानव सेवा प्रतिष्ठान, वज्रदल संघटना, विश्व हिंदु परिषद, सनातन संस्था, हिंदु जनजागृती समिती या संघटनाचे पदाधिकारी; महाविद्यालयीन युवक आणि युवती; राष्ट्रप्रेमी नागरिक