पुणे येथे कृषी विभागाच्या ५ एकर भूमीचा अजून एक घोटाळा उघडकीस !

पुणे – उपमुख्यमंत्री अजित पवार यांचे पुत्र पार्थ पवार अडचणीत आलेल्या भूमी व्यवहार प्रकरणात गुन्हा नोंद झालेल्या शीतल तेजवानी आणि दिग्विजय पाटील यांचे अजून एक प्रकरण समोर आले आहे. पुणे शहरातील ‘मुंबई कुळ वहिवाट आणि शेतभूमी अधिनियम १९४८’ अंतर्गत महानगरपालिका क्षेत्र नसतांनाही बोपोडी येथे हा भूमी अपहार करण्यात आला. शासनाच्या कह्यात असतांना आणि वहिवाट असतांनाही ५ एकर भूमी घशात घालण्याचा प्रयत्न करण्यात आला.

या प्रकरणी तहसीलदार सूर्यकांत येवले, शीतल तेजवानी यांसह ९ जणांच्या विरोधात खडक पोलीस ठाण्यात गुन्हा नोंद करण्यात आला आहे. पुण्यातील १ सहस्र ८०० कोटी रुपयांचा मोठा भूमी घोटाळा एका दिवसापूर्वीच उघडकीस आला आहे. या प्रकरणी चौकशीसाठी ५ सदस्यांची समिती स्थापन करण्यात आली आहे. १ सहस्र ८०० कोटी रुपयांच्या घोटाळ्याच्या प्रकरणी गुन्हा नोंद झालेल्या शीतल तेजवानी या पसार झाल्या आहेत. त्यांचा ३ दिवसांपासून शोध चालू आहे.

शीतल आणि तिचे पती सागर सूर्यवंशी यांनी खोट्या कागदपत्रांच्या आधारे १० कर्जे घेतली, यातून मिळालेली ४१ कोटी रुपयांची रक्कम इतरत्र गुंतवली होती. पिंपरी-चिंचवड येथील ‘सेवा विकास बँके’तील या घोटाळ्याच्या प्रकरणी सागर यांना राज्य गुन्हे अन्वेषण विभाग, पिंपरी-चिंचवड पोलीस आणि अंमलबजावणी संचालनालय यांच्याकडून अटक झाली होती. शीतल यांनी मात्र अटकपूर्व जामीन मिळवला होता. त्यामुळे शीतल यांनी केवळ भूमी व्यवहार प्रकरणात नव्हे, तर कर्ज प्रकरणातही फसवणूक केल्याचे समोर आले आहे.