बेळगावमध्ये जाणार्‍या शिवसैनिकांना कर्नाटक पोलिसांनी सीमेवर रोखले !

कोल्हापूर, १ नोव्हेंबर – गेली अनेक वर्षे सीमाभागातील लोक कर्नाटक सरकारच्या दडपशाहीच्या विरोधात १ नोव्हेंबर हा ‘काळा दिवस’ म्हणून पाळतात. मराठी भाषिकांना पाठिंबा देण्यासाठी आणि सीमालढ्यात मृत्यूमुखी पडलेल्या विरांना अभिवादन करण्यासाठी महाराष्ट्रातील शिवसेनेचे पदाधिकारी बेळगावकडे जातात. असे असले, तरी प्रत्येक वर्षी महाराष्ट्र-कर्नाटक सीमेवरील दूधगंगा नदीच्या पुलावर कर्नाटक पोलीस शिवसैनिकांना अडवतात. यंदाही कोल्हापूर येथून मोठ्या संख्येने शिवसैनिक बेळगावकडे जाण्यास निघाले असता कागलजवळ कर्नाटक पोलिसांनी त्यांना रोखले.

या प्रसंगी ‘बेळगाव, बीदर-भालकीसह संयुक्त महाराष्ट्र झालाच पाहिजे’, अशा घोषणांनी परिसर दणाणून गेला. या पदाधिकार्‍यांना कागल पोलीस ठाण्यात आणून नंतर सोडून देण्यात आले. यात मुख्यत्वेकरून सीमा समन्वय समितीचे अध्यक्ष आणि हातकणंगले लोकसभा मतदारसंघाचे अध्यक्ष धैर्यमाने यांना पोलिसांनी पुलावर अडवले. या वेळी काही काळ पुणे-बेंगळुरू महामार्गावर मोठा तणाव निर्माण झाला होता, तसेच काही काळ वाहतूक विस्कळीत झाली होती.