UKSSSC Paper Leak : ‘कॉपी जिहाद’ सहन केला जाणार नाही ! – उत्तराखंडचे मुख्यमंत्री धामी

प्रश्नपत्रिका फोडण्याच्या प्रकरणात उत्तराखंडचे मुख्यमंत्री धामी यांची चेतावणी

डेहराडून (उत्तराखंड) – राज्यात कुठल्याही परिस्थितीत ‘कॉपी जिहाद’ सहन केला जाणार नाही. युवकांच्या भविष्याशी छेडछाड करणार्‍यांना सरकार मुळापासून संपवल्याखेरीज स्वस्थ बसणार नाही, अशी चेतावणी उत्तराखंडचे मुख्यमंत्री पुष्कर सिंह धामी यांनी दिली. या प्रकरणात नुकतेच पोलिसांनी परीक्षेची प्रश्नपत्रिका फोडणार्‍या शाहीद आणि सदिया या दोघांना अटक केली आहे.

मुख्यमंत्री धामी पुढे म्हणाले की, आमच्या सरकारने कॉपी माफियांना आळा घालण्यासाठी कठोर कायदा लागू केला आहे. यामुळे २५ सहस्रांहून अधिक युवकांना सरकारी नोकर्‍यांची संधी मिळाली आहे आणि वर्ष २०२२ पासून आजवर १०० हून अधिक कॉपी माफियांना कारागृहात डांबण्यात आले आहे. तरीसुद्धा काही जण संघटित पद्धतीने परीक्षेची प्रश्नपत्रिका फोडण्याचे षड्यंत्र रचत आहेत. शिकवणी वर्गांचे (कोचिंग क्लासेसचे) आणि कॉपी माफियांचे संगनमत यांमुळे युवकांचे भविष्य अंधारात ढकलले जात आहे. त्यामुळे सरकार त्यांच्यावर अत्यंत कठोर कारवाई करेल.