चैतन्याच्या स्तरावर कार्य करणार्‍या आणि साधकांचा आधारस्तंभ असलेल्या श्रीसत्‌शक्ति (सौ.) बिंदा सिंगबाळ !

श्रीसत्‌शक्ति (सौ.) बिंदा सिंगबाळ यांना त्यांच्या ५८ व्या वाढदिवसानिमित्त अनेक शुभेच्छा !

‘चैतन्याच्या स्तरावर कार्य कसे होत असते’, याचे श्रीसत्‌शक्ति (सौ.) बिंदा नीलेश सिंगबाळ या मूर्तीमंत उदाहरण आहेत’, असे मी गेल्या वर्षी त्यांच्या संदर्भात म्हटले होते. याची प्रचीती यंदा माझ्या जन्मोत्सवानिमित्त ‘सनातन राष्ट्र शंखनाद महोत्सव’ आयोजित करतांना सर्वच साधकांना आली. एवढा मोठा सोहळा सनातनच्या इतिहासात पहिल्यांदाच होत होता. महोत्सवासाठीच्या विविध सेवांचे दायित्व साधक सांभाळणार असले, तरी साधनेच्या स्तरावर त्यांना योग्य दिशा देणे आवश्यक होते. श्रीसत्‌शक्ति (सौ.) बिंदा सिंगबाळ यांनी हे दायित्व लीलया पार पाडले. महोत्सवाच्या आयोजनाच्या अनुषंगाने होणार्‍या विविध बैठकांना उपस्थित राहून त्यांनी साधक आणि अन्य संघटनांचे प्रतिनिधी यांच्याकडून अनेक गोष्टी जाणून घेतल्या. यातून त्यांची शिष्यभावात राहून इतरांकडून शिकण्याची वृत्ती दिसून आली. सर्व साधकांना त्यांचा आधार वाटत होता आणि त्यांच्या उपस्थितीमुळे साधकांचा आत्मविश्वासही द्विगुणित झाला होता.

‘सनातन राष्ट्र शंखनाद महोत्सवा’त जाणवलेली सूत्रे आणि आलेल्या अनुभूती’ यांविषयीचे दैनिक ‘सनातन प्रभात’मध्ये प्रसिद्ध झालेले लिखाण वाचतांना साधकांसह समाजातील धर्मप्रेमींनाही श्रीसत्‌शक्ति (सौ.) बिंदा सिंगबाळ यांच्याविषयी स्थूल अन् सूक्ष्म स्तरावर अनुभूती आल्याचे लक्षात येते. श्रीसत्‌शक्ति (सौ.) बिंदा सिंगबाळ यांच्यातील व्यापकत्व आता वाढत आहे. केवळ साधकच नाही, तर समाजातील व्यक्तींनाही त्यांचे दिव्यत्व जाणवत आहे.

त्यांच्याकडून चैतन्याच्या स्तरावर आपोआप कार्य होत आहे आणि स्थुलातून भक्तीसत्संगाद्वारे त्या साधकांचे स्वभावदोष निर्मूलन व्हावे अन् त्यांची भक्ती वाढावी, यांसाठी प्रयत्न करत आहेत. त्यामुळे त्या साधकांचा साधनेतील आधारस्तंभ बनल्या आहेत. साधकांना घडवण्याचा आणि जिज्ञासूंना सनातन संस्थेशी जोडण्याचा वारसा त्या समर्थपणे पुढे चालवत आहेत. सनातनचे वटवृक्षाप्रमाणे वाढणारे सध्याचे कार्य पहाता माझे गुरु प.पू. भक्तराज महाराज यांनी मला दिलेल्या ‘सनातनचे कार्य देश-विदेशांत पोचेल’, या आशीर्वादाची प्रचीती येते. श्रीसत्‌शक्ति (सौ.) बिंदा सिंगबाळ आणि श्रीचित्‌शक्ति (सौ.) अंजली गाडगीळ यांच्या माध्यमातून हे कार्य उत्तरोत्तर वाढत आहे. साधकांनी त्यांच्या चैतन्यदायी सत्संगाचा आणि मार्गदर्शनाचा लाभ करून घ्यावा !

– सच्चिदानंद परब्रह्म डॉ. आठवले