CT Ravi : भाजपचे आमदार सी.टी. रवि यांच्याविरुद्ध गुन्हा नोंद !

चिथावणीखोर भाषण केल्याचा पोलिसांचा आरोप

मंड्या (कर्नाटक) – मद्दुरू येथे श्री गणेशमूर्तींच्या विसर्जन मिरवणुकीच्या वेळी चिथावणीखोर भाषण केल्याच्या आरोपाखाली कर्नाटकातील हिंदुद्वेषी पोलिसांनी भारतीय जनता पक्षाचे आमदार आणि माजी मंत्री सी.टी. रवि यांच्याविरुद्ध गुन्हा नोंदवला आहे. सी.टी. रवि यांनी त्यांच्या भाषणात ‘हिंदूंच्या वाट्याला गेलात, तर शिरछेद करू’, अशी धमकी दिल्याचा आरोप पोलिसांनी केला. मद्दुरूमध्ये विसर्जन मिरवणुकीवर झालेल्या दगडफेकीच्या घटनेच्या विरोधात निदर्शने चालू झाल्यानंतर मद्दूरूमध्ये मोठा पोलीस बंदोबस्त तैनात करण्यात आला होता. पोलीस अधिकार्‍यांच्या म्हणण्यानुसार, रवि यांनी नुकतेच मद्दुरूमध्ये विसर्जन मिरवणुकीच्या वेळी प्रक्षोभक भाषण केले. त्यामुळे दोन समुदायांमध्ये तेढ निर्माण झाला.

उपमुख्यमंत्री डी.के. शिवकुमार यांनी हिंसाचारग्रस्त मद्दुरू प्रदेशाला भेट देणार्‍या भाजपच्या नेत्यांवर टीका केली. शिवकुमार यांनी भाजप नेत्यांना देहलीला भेट देऊन केंद्राकडून विकास प्रकल्पांना संमती मिळवण्याचे आवाहन केले. मुख्यमंत्री सिद्धरामय्या यांनी कर्नाटकातील शांतता भंग करण्याचा आरोप रा.स्व. संघ आणि भाजप यांच्यावर केला.