अंतराळ मोहिमेच्या वेळी गोळा केलेल्या माहितीचा उपयोग गगनयान मोहिमेसाठी होईल ! - Shubhanshu Shukla

नवी देहली – आम्ही ‘ॲक्सियम मोहिमे’अंतर्गत २ आठवडे आंतरराष्ट्रीय अंतराळ स्थानकात राहिलो. मी या मोहिमेचे नेतृत्व करत होतो. ही मोहीम संपूर्णपणे भारताचीच मोहीम होती, असे वक्तव्य अंतराळवीर ग्रुप कॅप्टन शुभांशु शुक्ला यांनी केले. गगनयान मोहिमेसाठी भारतीय हवाई दलाच्या ४ वैमानिकांची निवड करण्यात आली असून त्यांपैकी ग्रुप कॅप्टन शुभांशु शुक्ला एक आहेत. त्यामुळेच ते अमेरिकेच्या ‘ॲक्सिअम मोहिमे’त सहभागी झाले होते. या मोहिमेच्या अंतर्गत गोळा केलेल्या माहितीचा उपयोग भविष्यात गगनयान आणि भारताच्या अन्य अंतराळ मोहिमेसाठी होईल, असेही ते म्हणाले.

ग्रुप कॅप्टन शुक्ला यांनी ‘गगनयान’ मोहिमेविषयी म्हटले की, ही इस्रोची मानवी अंतराळ मोहीम आहे. यांतर्गत वर्ष २०२७ मध्ये हवाईदलाचे ३ वैमानिक अंतराळयानात पाठवले जातील. हे वैमानिक पृथ्वीपासून ४०० किमी कक्षेत ३ दिवस रहातील. त्यानंतर हे अंतराळयान हिंद महासागरात उतरवले जाईल. याला अनुमाने २० सहस्र १९३ कोटी रुपये खर्च येणार आहे.