सनातन प्रभात > Post Type > बातम्या > आंतरराष्ट्रीय बातम्या > Iran Expels Refugees :  इराणकडून १०० दिवसांत १० लाख अफगाण निर्वासितांची हकालपट्टी !

Iran Expels Refugees :  इराणकडून १०० दिवसांत १० लाख अफगाण निर्वासितांची हकालपट्टी !

तेहरान (इराण) – इराणने अफगाण निर्वासितांवर कठोर कारवाई चालू केली आहे. इराणने गेल्या १०० दिवसांत अनुमाने १० लाख अफगाण नागरिकांना परत पाठवले असून त्यांपैकी ४ लाख जण एकट्या तेहरान प्रांतातील आहेत, अशी माहिती तेहरानचे राज्यपाल महंमद सादिक मोतामेदियन यांनी दिली. गेल्या महिन्यात इस्रायलशी झालेल्या युद्धानंतर इराणने देशातील अवैध अफगाण शरणार्थींवर कारवाई चालू केली आहे.

१. इराणच्या सामाजिक कामगार संघटनेचे प्रमुख हसन मौसावी चेलिक म्हणाले की, अलीकडच्या काळात अफगाण निर्वासितांना बाहेर काढतांना अधिकार्‍यांनी तेे कायदेशीररित्या रहात आहे कि अवैधरित्या, हे न पहाता सरसकट कारवाई केली आहे.

२. इराणी अधिकार्‍यांच्या म्हणण्यानुसार काही अफगाण गटांवर हेरगिरी, आतंकवाद आणि ड्रोन बनवण्यासारख्या गंभीर आरोपांची चौकशी चालू आहे. त्यामुळे देशात त्यांची उपस्थिती धोकादायक ठरू शकते.

मार्च २०२५ मध्ये दिली होती चेतावणी !

इराणने मार्च २०२५ मध्ये ‘बेकायदेशीर रहाणार्‍यांनी ६ जुलैपर्यंत देश सोडावा, अन्यथा कारवाई केली जाईल’, अशी स्पष्ट चेतावणी दिली होती. यानंतरही अनेक निर्वासितांनी याकडे दुर्लक्ष केल्याने त्यांना आता हाकलून लावण्यात येत आहे. इराणमध्ये ६० लाखांपर्यंत अफगाण नागरिक रहातात. त्यामुळे मूलभूत सोयीसुविधांवर ताण वाढत आहे.

संवेदनशीलता दाखवा ! – अफगाणिस्तान

अफगाणिस्तानच्या तालिबानी सरकारचा पंतप्रधान महंमद हसन अखुंद याने  इराणला संवेदनशीलता दाखवण्याचे आवाहन केले आहे. संयुक्त राष्ट्रांच्या स्थलांतर संस्थेच्या अफगाणिस्तानातील संचालक मिया पार्क यांनी सांगितले की, इराणने अफगाणांशी आदराने वागले पाहिजे.

संपादकीय भूमिका

इस्लामी देश इराण त्यांच्याच धर्मबांधवांना घुसखोर नाही, तर निर्वासित म्हणून आलेल्यांना देशातून हाकलून लावतो, तर बांगलादेशी आणि रोहिंग्या घुसखोर यांच्या संदर्भात भारत अशी कठोर भूमिका कधी घेणार ?

नूतन लेख