सुरक्षेसाठी विदेशीऐवजी स्वदेशी तंत्रज्ञानावर गुंतवणूक करावी लागेल ! – CDS GEN Anil Chauhan

तिन्ही सैन्यदलांचे प्रमुख जनरल अनिल चौहान यांची स्पष्टोक्ती

नवी देहली : विदेशातून आयात केलेल्या तंत्रज्ञानावर अवलंबून राहिल्याने आपली युद्ध सिद्धता दुर्बल होते. ‘ऑपरेशन सिंदूर’ने आपल्याला दाखवून दिले आहे की, आपल्यासाठी स्वदेशी ‘सी-यूएएस्’ (काऊंटर-अनमॅनेड एरियल सिस्टम) म्हणजेच ड्रोनविरोधी प्रणाली असणे का महत्त्वाचे आहे.

आपल्याला आपल्या सुरक्षेसाठी गुंतवणूक करावी लागेल, अशी माहिती तिन्ही सैन्यदलांचे प्रमुख (सीडीएस् – चीफ ऑफ डिफेन्स स्टाफ) जनरल अनिल चौहान यांनी येथे दिली. ‘कालच्या (जुन्या) शस्त्रांनी आपण आजच्या लढाया जिंकू शकत नाही’, असेही त्यांनी या वेळी स्पष्ट केले.

जनरल चौहान यांनी म्हटले की,

‘ऑपरेशन सिंदूर’च्या वेळी पाकिस्तानने नि:शस्त्र ड्रोनचा वापर केला. बहुतेक ड्रोन पाडण्यात आले. त्यांपैकी कोणतेही ड्रोन सैनिकी किंवा नागरी पायाभूत सुविधा यांना हानी पोचवू शकले नाहीत. मला वाटते की, ड्रोन हे उत्क्रांतीवादी आहेत आणि युद्धात त्यांचा वापर अतिशय क्रांतीकारी ठरला आहे. भारतीय सैन्याने क्रांतीकारी पद्धतीने ड्रोनचा वापर केला. आपण लढलेल्या अनेक युद्धांमध्ये तुम्ही हे पाहिले असेल.