Karnataka Heart Attacks : कर्नाटकातील हासनमध्ये ४० दिवसांत हृदयविकाराच्या झटक्याने २३ जणांचा मृत्यू !

बेंगळुरू – कर्नाटकातील हासनमध्ये हृदयविकाराच्या झटक्याने मृत्यू होण्याचे प्रमाण झपाट्याने वाढत आहे. गेल्या ४० दिवसांत येथे हृदयविकाराच्या झटक्यामुळे २३ जणांचा मृत्यू झाला आहे. त्यांपैकी ६ जण १९ ते २५ या वयोगटातील होते, तर ८ जण २५ ते ४५ या वयोगटांतील होते. बंगळुरूमधील जयदेव रुग्णालयात हृदयविकाराच्या रुग्णांच्या संख्येत ८ टक्क्यांनी वाढ झाली आहे. या घटनांमुळे नागरिकांमध्ये भीतीचे वातावरण आहे.

१. डॉक्टरांनी सांगितले की, हसन आणि जवळच्या जिल्ह्यांमधून सहस्रो लोक खबरदारीची उपाययोजना म्हणून हृदयाशी संबंधित तपासणीसाठी प्रतिदिन मैसुरूमधील जयदेव रुग्णालयात पोहोचत आहेत.

२. जयदेव रुग्णालयाचे वैद्यकीय अधीक्षक डॉ. के.एस्. सदानंद म्हणाले, ‘‘माध्यमांमध्ये बातम्या पाहिल्यानंतर लोक घाबरून रुग्णालयात धावत आहेत. रुग्णालयात एकदा चाचणी करून समस्या सुटणार नाहीत. लोकांनी जवळच्या कोणत्याही रुग्णालयात जाऊन त्यांच्या हृदयाची तपासणी करून घ्यावी. केवळ हृदय तपासणी करून भविष्यातील समस्या टाळता येणार नाहीत. जीवनशैलीत पालट करणे, तसेच चांगले आरोग्य राखण्यासाठी नियमित व्यायाम करणेही आवश्यक आहे.

३. जागतिक आरोग्य संघटनेच्या मते प्रतिवर्षी अनुमाने ६ कोटी लोकांचा मृत्यू होतो. यांपैकी अनुमाने ३२ टक्के मृत्यू हृदयरोगामुळे होतात. हा आजार जगात सर्वाधिक मृत्यूंचे कारण आहे. प्रतिवर्षी अनुमाने १ कोटी ७५ लाख लोक कोणत्या ना कोणत्या हृदयरोगामुळे त्यांचे प्राण गमावत आहेत.

४. पूर्वी हृदयरोगाचे बहुतेक रुग्ण ६० वर्षांपेक्षा अधिक वयाचे होते. आता नवीन समस्या अशी आहे की, गेल्या काही वर्षांत ३० वर्षांपेक्षा अल्प वयाचे लोकही त्याचे बळी ठरत आहेत. कोरोना महामारीनंतर हृदयविकाराच्या घटनांमध्ये वाढ होतांना दिसत आहे.