ज्येष्ठ शिक्षणतज्ञ डॉ. शं.ना. नवलगुंदकर यांचे निधन

पुणे, ५ जुलै – सावित्रीबाई फुले, पुणे विद्यापिठाचे तत्कालीन (पुणे विद्यापीठ) माजी प्रभाग कुलगुरु आणि सावरकरवादी ज्येष्ठ शिक्षणतज्ञ डॉ. शंकर नागेश नवलगुंदकर (वय ८९ वर्षे) यांचे ५ जुलै या दिवशी पुणे येथे निधन झाले. ६ जुलै या दिवशी सकाळी १०.३० वाजता वैकुंठ स्मशानभूमीत अंत्यसंस्कार करण्यात आले. त्यांचे वडील शिक्षक होते. त्यांचे मूळ गाव संगमनेर असून त्यांचे शिक्षण तेथील पेटीट हायस्कूल येथे, तर महाविद्यालयीन शिक्षण नाशिक येथील एच्.पी.टी. महाविद्यालयात झाले. त्यांनी अर्थशास्त्रात पदवी मिळवली. स्वातंत्र्यवीर सावरकर यांच्या विचारावर त्यांनी पीएच्.डी. मिळवली.

वर्ष १९५८ ला पुण्यातील सराफ विद्यालयात (आता भारत हायस्कूल) नंतर शाहू महाविद्यालय, गरवारे महाविद्यालय, मॉडर्न महाविद्यालय आणि पुणे विद्यापीठ येते अध्यापन केले. पुणे विद्यापिठात ते प्रभाग कुलगुरु झाल्यावरही टिळक महाराष्ट्र विद्यापीठ, मुंबई विद्यापीठ आणि पुणे विद्यापिठात ते अर्थशास्त्र आणि राज्यशास्त्र शिकवत. सावरकरांच्या विचार प्रसारासाठी त्यांनी अमेरिका, मॉरिशस येथे व्याख्याने दिली आहेत.