Pakistani Spy : पाकसाठी हेरगिरी करणार्‍या देहलीतील नौदलाच्या मुख्यालयातील लिपिकाला अटक

पाकिस्तानला ‘ऑपरेशन सिंदूर’चीही पुरवली होती गोपनीय माहिती !

नवी देहली – येथील भारतीय नौदलाच्या मुख्यालयात लिपिक (क्लार्क) म्हणून कार्यरत असणार्‍या विशाल यादव या कर्मचार्‍याला पाकसाठी हेरगिरी केल्याच्या आरोपावरून अटक करण्यात आली. विशाल यादव भारताच्या संरक्षणाशी संबंधित गोपनीय माहिती पाकची गुप्तचर यंत्रणा आय.एस्.आय.ला (इंटर सर्व्हिस इंटेलिजन्स – आंतरसेवा गुप्तचर यंत्रणेला) पुरवत होता. विशेष म्हणजे ‘ऑपरेशन सिंदूर’च्या वेळीही त्याने गोपनीय माहिती पाकला पुरवली. अनेक महिने त्याच्यावर पाळत ठेऊन राजस्थान पोलिसांच्या गुप्तचर शाखेने त्याला अटक केली. तो हरियाणातील रहिवासी आहे. यादव हा आय.एस्.आय.साठी काम करणार्‍या प्रिया शर्मा नावाच्या महिलेच्या सामाजिक माध्यमाद्वारे संपर्कात होता.

विशाल यादव याने नौदल मोहिमांविषयीची गोपनीय माहिती आणि अन्य संरक्षण संस्था यांविषयीची माहिती प्रिया शर्मा हिला माहिती पुरवली. या बदल्यात तिने विशाल यादव याला पैसे पाठवल्याचे पोलिसांनी सांगितले. तो या महिलेल्या अनेक वर्षांपासून संपर्कात होता. त्याने या काळात अनेक माहिती तिला पुरवली. त्याने किती गोपनीय माहिती दिली ? या हेरगिरीच्या जाळ्यामध्ये आणखी किती जण आहेत ?, ते शोधून काढण्यासाठी विशाल यादव याची कसून चौकशी काली जात आहे.