‘लाडली लक्ष्मी’ योजनेचे ४ सहस्र ३११ अर्ज मागील ३ वर्षे प्रलंबित

पणजी, २ फेब्रुवारी (वार्ता.) – सरकारच्या ‘लाडली लक्ष्मी’ योजनेचे ४ सहस्र ३११ अर्ज मागील ३ वर्षे प्रलंबित आहेत. महिला आणि बाल कल्याण खात्याने जुलै २०२४ मध्ये झालेल्या विधानसभा अधिवेशनात प्रलंबित अर्ज त्वरित मार्गी लावण्याचे आश्वासन दिले होते; मात्र हे आश्वासन देऊन ७ मास उलटूनही हे अर्ज अजूनही प्रलंबित आहेत.

माजी मुख्यमंत्री स्व. मनोहर पर्रीकर यांनी वर्ष २०१२ मध्ये ‘लाडली लक्ष्मी’ ही लोकप्रिय योजना चालू केली. या योजनेच्या अंतर्गत वार्षिक ३ लाखांहून अल्प आर्थिक उत्पन्न असलेल्या कुटुंबातील मुलीला लग्नासाठी १ लाख रुपयांचे आर्थिक साहाय्य दिले जाते. यानंतर सरकारने वर्ष २०२२ मध्ये योजनेच्या अंतर्गत वार्षिक उत्पन्नाची मर्यादा वाढवून ती ८ लाख रुपये केली. पूर्वी लग्नाच्या अगोदर या योजनेसाठी अर्ज करण्याची मोकळीक होती; मात्र वर्ष २०२२ नंतर लग्न झाल्यानंतरच या योजनेसाठी अर्ज करण्याची अट घालण्यात आली. या योजनेचे मागील ३ वर्षांत ४ सहस्र ३११ अर्ज महिला आणि बाल कल्याण खात्याकडे प्रलंबित आहेत.