चहापाण्याचा व्यय द्या, खिडकीतून कॉपी पुरवतो, पोलिसांची अडचण नाही ! – विद्यार्थ्यांना कॉपी पुरवणार्‍या तरुणाचे वक्तव्य

• इयत्ता १२ वीच्या परीक्षा केंद्रावर विद्यार्थ्यांना कॉपी पुरवणार्‍या तरुणाचे वक्तव्य !  

• पैठण (छत्रपती संभाजीनगर) येथील प्रकार !

कॉपी देणार्‍याला पोलीस म्हणाले, सावकाश जा !

परीक्षा केंद्रावर ४ पोलीस कर्मचारी होते. त्यांच्यासमोर अनेक जण परीक्षा केंद्रात जाऊन कॉप्या पुरवत होते. काहींना तर पोलीस स्वत: सूचना देत होते, ‘खिडकीवर चढू नका, सावकाश जा.’ ‘हे साहेबांचे महाविद्यालय आहे. येथे एकही विद्यार्थी अनुत्तीर्ण होणार नाही. ते वर्गातील शिक्षकांना आधीच सांगून ठेवतात…’ असे ही एका पालकांनी सांगितले. परीक्षा वरच्या मजल्यावर चालू होती. बाहेरून कॉप्या पुरवणारे तरुण येथे गर्दी करत होते. त्यावर ‘बाहेरून कॉप्या कशाला देता रे, आतमध्ये सर्व व्यवस्थित चालू आहे’, असे शिक्षक कॉपी पुरवणार्‍यांना सांगत होते. प्रश्नपत्रिका हातात पडताच एकमेकांची उत्तरे पाहून विद्यार्थी पेपर लिहित होते. ‘आवाज करू नका, शांततेत पेपर लिहा,’ अशी सूचना पर्यवेक्षक विद्यार्थ्यांना करत होते.

संपादकीय भूमिका 

शैक्षणिक क्षेत्रातील अनैतिकता गंभीर आहे. असे विद्यार्थी पुढे देशाचे आदर्श ठरतील का ? त्यामुळे असे प्रकार न होण्यासाठी शिक्षण मंडळाने संबंधित महाविद्यालयाच्या प्राचार्यांसह शिक्षकांवर बडतर्फ आणि फौजदारी कारवाई केली पाहिजे !