Rahul Gandhi in Kashi : राहुल गांधी यांनी घेतले श्री काशी विश्‍वनाथाचे दर्शन !

वाराणसी (उत्तरप्रदेश) – काँग्रेसचे नेते राहुल गांधी यांची ‘भारत जोडो न्याय यात्रा’ ३५ व्या दिवशी वाराणसीत पोचली. या वेळी त्यांनी श्री काशी विश्‍वनाथाचे दर्शन घेतले. नंतर त्यांची जाहीर सभाही झाली. गांधी म्हणाले की, देशात पसरत असलेला द्वेष आणि हिंसाचार अन्यायामुळे आहे. शेतकरी तरुणांवर सामाजिक आणि आर्थिक अन्याय होत आहे.

गांधी पुढे म्हणाले, ‘या यात्रेच्या संपूर्ण प्रवासात मला कुठेही द्वेष दिसला नाही. भारत हा द्वेषाचा नाही, तर प्रेमाचा देश आहे. सर्वांनी एकजुटीने काम केले, तरच देश सशक्त होईल. ४ सहस्र किलोमीटरच्या ‘भारत जोडो यात्रे’त मी शेतकरी, कामगार, छोटे व्यापारी आणि महिला यांची भेट झाली. या सर्वांनी मला त्यांच्या व्यथा सांगितल्या. देशातील अब्जाधीशही गरीबांइतकाच कर भरत आहेत. यामुळेच आम्ही ‘भारत जोडो यात्रे’त न्याय हा शब्द जोडला. देशात २ भारत आहेत. एक अब्जाधीश आहे आणि दुसरा गरीब आहे. सर्व प्रसारमाध्यमे ही उद्योजक गौतम अदानी आणि मुकेश अंबानी यांची आहेत. शेतकरी, कामगार आणि गरीब यांच्याविषयी ते कधीच सहानुभूती दाखवणार नाहीत.