दोघा भावांकडून तरुणीची कुर्‍हाडीने वार करून हत्या !

कौशांबी (उत्तरप्रदेश) – जिल्ह्यातील देर्हा गावात २१ नोव्हेंबरच्या सायंकाळी एका २० वर्षीय तरुणीची कुर्‍हाडीने वार करून हत्या करण्यात आली. अशोक आणि पवन निषाद या दोघा भावांनी तरुणीची हत्या केल्याचे प्रत्यक्षदर्शी गावकर्‍यांनी सांगितले. यातील अशोक हा एका हत्येच्या प्रकरणात कारागृहात असून सध्या जामिनावर आहे. त्याचा भाऊ पवन याने ३ वर्षांपूर्वी तरुणीवर बलात्कार केला होता. त्याच्या विरोधातही गुन्हा नोंदवण्यात आला होता. प्रकरण महेवाघाट पोलीस ठाण्याच्या सीमेतील आहे.

१. स्थानिक लोकांच्या म्हणण्यानुसार, आरोपी तरुणीवर रस्त्यावर धारदार कुर्‍हाडीने वार करत होते. या वेळी तेथे उपस्थित लोकांनी केवळ बघ्याची भूमिका घेतली.

२. पवनने तरुणीवर ३ वर्षांपूर्वी केलेल्या बलात्कारानंतर पीडितेच्या कुटुंबियांनी त्याच्या विरोधात तक्रार प्रविष्ट केली होती. त्याच्या विरोधात न्यायालयात खटलाही चालू होता. पवन पीडितेच्या कुटुंबियांवर खटला मागे घेण्यासाठी सातत्याने दबाव आणत होता, तसेच तरुणीला जिवे मारण्याची धमकीही देत होता. (या प्रकरणी पोलिसांनी पीडिता आणि तिचे कुटुंबीय यांना संरक्षण का दिले नाही ? त्यामुळे या घटनेला पोलीसही उत्तरदायी आहेत, असे म्हणायचे का ? – संपादक)